مایکل کوګلمن: امریکا د تېر په پرتله د افغانستان په اړه پر ځای پرېکړه کړې ده

په ویلسن څېړنیز مرکز کې د جنوبي اسیا د مسایلو څېړونکی مایکل کوګلمن وايي، امریکا په تېرو اتلسو کلونو کې یوازې د سرتېرو ډېرولو او جګړو تګلاره په افغانستان کې عملي کوله، خو د سیاسي حل لپاره یې هڅې نوې او پر ځای پرېکړه ده. دده په خبره سره له دې چې سیاسي حل وخت او پوره دقت غواړي خو بیا هم دغه پرېکړه سمه او پر ځای ده. کوګلمن وايي، امریکا باید مخکې دا مسئله درک کړې وی، چې افغان جګړه له نظامي لارو نه بلکې له سیاسي لارو د حل وړ ده او یوازې له همدې لارې افغانستان ته ثبات راتللی شي. د نوموړي په خبره افغان جګړه نه یوازې افغانانو، بلکې په امریکا کې د ټرمپ په ګډون ټولو اړخونو ته نور ستړې کوونکې ده خو بیا هم هیله دا ده، چې د بهرنیو چارو وزارت اقدامات بریالي شي. هغه همدا راز خبرداری ورکړی، چې ښايي د مذاکراتو پر مهال د ټاکنو او نورو مسایلو په اړه کړکېچ زیات شي نو امریکا باید دې ته تیاره وي چې هر څه مدیریت کړي او د بحران د یوه نوي پړاو د پيلېدو مخه ونیسي.