د اپرېل ۲۳مه چې د کتاب له نړیوالې ورځې سره برابره ده، د افغانستان په ګډون په ډېرو هېوادونو کې تېره ورځ ونمانځل شوه.
د کابل ښار کتابپلورنځیو ته په دې ورځ ډېر ځوانان، محصلین او د پاخه عمر کسان ورغلل او د خپلې خوښې کتابونه یې وپېرل.
دغو کتابپلورنځیو ته راغلو کسانو ویلي، چې د انټرنېټ له نړۍ سربېره ډېر محصلین او ځوانان کتابپلورنځیو ته ورځي او د کتاب لوستلو فرهنګ لا ژوندی دی.
په کابل ښار کې د اکسوس او دانش خپرندویه ټولنو ترڅنګ، ډېر نور کتابپلورنځي موجود دي، چې هر کال د کتاب نړیوالې ورځې لپاره په خپلو بیو کې تخفیف راولي.
دوی ويلي چې له مطالعې سره د خلکو د لېوالتیا زیاتوالي او د کتاب لوستلو دود ژوندي ساتلو لپاره هڅه کوي، چې د کتابونو د پلور په برخه کې ځانګړی تخفیف ولري.
په کابل کې د اکسوس کتابپلورنځي مسوول صفي الله ناصري په دې اړه ویلي: «کله چې د کتاب نړیواله ورځ وي، عموماً کله چې اکسوس خپل فعالیت پیل کړی دی، له هماغې لومړۍ ورځې تر ننه هر کال موږ د کتاب نړیواله ورځ نمانځو او د دغې ورځې د استقبال په خاطر موږ ځینې ابتکارات کوو او د خپلو مشتریانو لپاره ځانګړي تخفیفونه په پام کې نیسو».
په افغانستان کې د کتاب ورځې د نمانځنې لپاره د حکومت له خوا کوم خاص پروګرام نه دی نیول شوی، بلکې په خپله ډېری افغانان د مطالعې دود د ژوندي ساتلو لپاره هرکال په دې ورځ کتابونه رانیسي او مطالعه کوي یې.
