ولسمشر غني: هر څه چې اساسي قانون څنډې ته کوي هغه کودتا ده

افغان ولسمشر محمد اشرف غني وايي، هر هغه څه چې د افغانستان اساسي قانون څنډې ته کوي، یوه کودتا ده. ولسمشر غني د افغانستان ملي شورا له نویو ټاکل شویو غړیو سره لومړنۍ ناسته کې ویلي، چې دوی د ولسواکۍ شریکان دي. دده په خبره د حکومت په مقابل کې نه بلکې دواړه لوري ملت ته ځواب ورکوونکي او د ملت پر وړاندې مسوول دي. له ولسمشرۍ ماڼۍ په یوه خپره شوې اعلامیه کې د ولسمشر غني له قوله ویل شوي، چې د ملت کور باید دکشمکشونو پر میدان بدل نه شي او ټولې ستونزې د خبرو او ګډو هڅو له لارې حل شي. ولسمشر غني ټاکل شویو استازو ته په خبرو کې د سولې او سولې مشورتي جرګې پر اهمیت هم ټینګار وکړ او د سولې په مشورتي لویه جرګه کې یې د ملي شورا په ځانګړي ډول د ولسي جرګې د غړو فعال شتون مهم وباله.