د روان میلادي کال په لومړیو درېیو میاشتو کې تر ۶۰۰ ډېرو ملکي وګړو ته مرګ ژوبله اوښتې ده. د یوناما له لوري په خپاره شوي یوه راپور کې راغلي چې د جنورۍ له لومړۍ نېټې د روان کال د مارچ تر ۳۱مې په افغانستان کې ۶۰۸ ملکي وګړو ته مرګ ژوبله اوښتې ده. په راپور کې راځي چې دغه شمېره د تېر کال د همدې مودې په پرتله ۳۹سلنه لوړوالی ښيي. یوناما وایي تر ټولو ډېره مرګ ژوبله د طالبانو او نورو وسله والو ډلو په بریدونو کې اوښتې ده. د سرچینې په وینا ۱۷ سلنه مرګ ژوبله افغان ځواکونو، ۱۳ سلنه بهرنیو ځواکونو او ۲ سلنه د حکومت پلوه وسله والو له لوري ملکي وګړو ته اوښتې ده. راپور همدا راز وایي چې د ملکي وګړو ۱۲ سلنه مرګ ژوبله د داعش ډلې او ۳۹ سلنه بیا د طالبانو له لوري رامنځ ته شوې ده. یوناما د ملکي وګړو د مرګ ژوبلې پر ډېرېدو خواشیني ښودلې او پر ښکېلو لورو یې غږ کړی چې د ملکي وګړو د ژوند خوندیتوب ته جدي پاملرنه وکړي.
