قومي مشران: حکومت دې پر وخت په خوګیاڼو کې دداعش مخه ونیسي

په ننګرهار کې دداعش او طالبانو ترمنځ نښتې پیل شوې چې له امله یې سلګونه کورنۍ بې ځایه شوې دي. د خوګیاڼو قومي مشران وايي له تېرو درېیو ورځو راهیسې په خوګیاڼو او شېرزادو ولسوالۍ کې د طالبانو او داعش ډلې ترمنځ جګړه پيل شوې ده چې له امله یې لسګونه کورنۍ بې کوره شوې او مرکز جلال اباد ته یې کډه کړې ده. ددوی په وینا جګړې خطرناکې دي او که حکومت مداخله و نه کړي نو ښايي ملکي وګړو ته درانه تلفات پکې واوړي. د قومي مشرانو په خبره حکومت ته په کار ده چې دداعش ډلې پر وړاندې پر وخت اقدام وکړي او ددوی د پرمختګ مخه ونیسي. بل پلو د ننګرهار د والي ویاند عطا الله خوګیاڼی وايي، چې له بېځایه شوو کورنیو سره د مرستې لړۍ پیل شوې ده. دده په خبره تر ۳۰۰ پورې کورنۍ بېځایه شوې دي چې لومړنۍ مرستې یې ورسره کړې دي. هغه همدا راز وايي چې حکومتي ځواکونه به ډېر ژر په خوګیاڼو ولسوالۍ کې د وسله والو ډلو پر ضد عملیات هم پيل کړي.