بهرنیو چارو وزارت: مسکو کې له کېدونکي غونډې د ښو پایلو تمه لرو

بهرنیو چارو وزارت په مسکو کې د افغانستان په اړه د امریکا، روسیې او چین له درې اړخیزې غونډې هرکلی کړی دی او تمه یې ښودلې چې دا غونډه به دسولې په برخه کې ګټوره ثابته شي. د بهرنیو چارو وزیر صلاح الدین رباني نن په کابل کې خبریالانو ته ویلي چې افغانستان له دې غونډې څخه د ښو پایلو تمه لري. رباني زیاته کړې افغان حکومت تل د سولې او ثبات په اړه د سیمه ییزې او نړیوالې اجماع د رامنځته کېدو هڅه کړې ده او دا غونډه به یو ښه او مثبت ګام وي. نوموړی دا څرګندونې په داسې حال کې کوي چې ټاکل شوې، نن په مسکو کې د افغانستان د حالاتو د څیړلو لپاره د افغانستان لپاره د روسیې، چین او د امریکا د متحده ایالاتو ځانګړي استازي غونډه وکړي.