خالد: طالبان د جګړې په تېزولو سره د سولې خبرو کې امتیاز غواړي

د دفاع وزارت سرپرست اسدالله خالد وایي، د پسرلي په راتګ سره هېواد کې د جګړې اور تېز شوی دی. خو نوموړي ډاډ ورکړ چې په هره برخه کې به وسله والو مخالفینو ته ماتې ورکړي. خالد نن د حکومت د حساب ورکولو په غونډه کې د خبرو پر مهال وویل، طالبان د جګړې په شدت سره غواړي د سولې په پروسه کې امتیاز طلبي وکړي. هغه د خپلو خبرو پر دوام وویل چې تېر کال یې له لاسته راوړنو ډک وو او سږکال به هم د ځینو هېوادونو لخوا په پوځي برخه کې افغان امنیتي ځواکونو سره مرستې وشي. دا په داسې حال کې ده چې د افغان حکومت له لوري د خالد په نوم جنګي پلان او د طالبانو له لوري د الفتح په نوم عملیات اعلان شوي چې د هېواد په ډېریو ولایتونو کې یې د جګړې اور لا تېز کړی دی.