بهرنیو چارو وزارت: طالبان دې د مسکو له اعلامیې ښه ګټه پورته کړي

بهرنیو چارو وزارت وایي، په مسکو کې له جوړې شوې درې اړخیزې غونډې هرکلی کوي او هر هغه هېواد چې د افغان سولې برخه کې مرسته کوي دوی ته د قدر وړ دی. د یاد وزارت ویاند صبغت احمدي وایي، طالبان باید د مسکو غونډې له خپرې شوې اعلامیې ښه ګټه پورته کړي. نوموړي ویلي په ترسره شوې غونډه کې د افغانانو په مشرۍ د سولې خبرو پر ترسره کېدو ټینګار شوی دی او له طالبانو غوښتنه شوې چې هر څومره ژر کېدای شي له افغان حکومت سره خبرو ته کېني. دا په داسې حال کې ده چې په مسکو کې ترسره شوې درې اړخیزه غونډه کې ویل شوي چې پر طالبانو باید فشار راوړل شي څو له افغان حکومت سره خبرو ته کېني خو طالبانو تل له افغان حکومت سره له مخامخ خبرو انکار کړی دی.