ولسمشر غني د سولې د هڅو په لړ کې پرون یو ویډیويي پیغام خپور کړ. نوموړي په خپلو خبرو کې وویل چې دوی د سولې لپاره کار کوي، خو د سولې په برخه کې به د تدبیر له مخې ګامونه اوچتوي، ځکه نه غواړي په دې توګه د ډاکټر نجیب الله او داوود خان تېروتنې تکرار کړي. هغه وویل چې سوله د هر افغان ارمان ده او افغان حکومت د دغه هیلې پوره کولو ته ژمن دی.
محمد اشرف غني په خپلو پرونیو خبرو کې د افغانستان سوله د ټولې سیمې لپاره مهمه و بلله او په خبره یې د سولې له هڅو سره په سیمه کې روان سیاستونه مستقیمه اړیکه لري. هغه ادعا کړې چې په سیمه کې په ټولو روانو سیاسي لوبو او حالاتو خبر دی، نو له همدې امله سولې ته محتاط هیله من دی او په دې برخه کې هر ګام په دقت او تدبیر اخلي. هغه زیاته کړه، «موږ نه غواړو د ډاکټر نجیب الله او سردار داوود خان تېروتنې تکرار کړو. دوی په سیمه کې له روانو حالاتو سم درک نه درلود، له همدې امله یې د سولې په برخه کې عجولانه ګامونه اوچت کړل. زه په سیمه کې په روان وضعیت او تحولاتو خبر یم. هر څه راته معلوم دي، نو له همدې امله غواړم د سولې په برخه کې له احتیاط او پوره تدبیره کار واخلم.»
ولسمشر غني په خپلو پرونیو خبرو کې د لومړي ځل لپاره په هېواد کې د بهرنیو ځواکونو هوایي بریدونه هم په څنګزنه توګه وغندل. د ده په خبره، هېڅ افغان نه غواړي چې د سنګین په څېر پېښې تکرار شي او ماشومان یې د پردۍ جګړې لپاره ووژل شي. هغه پر طالبانو هم غږ وکړ چې دغه جګړې ته د پای ټکی کېږدي. د ولسمشر غني په خبره، طالبان د پردیو د ګټو لپاره پر جګړه بوخت دي، نو له همدې امله له دغه ډلې غواړي چې جګړه پرېږدي او د سولې لار خپله کړي.
هغه د خپلو خبرو په دوام د بهرنیو ځواکونو وتلو ته هم اشاره وکړه. ولسمشر غني وویل، بهرني ځواکونه د یوې هوکړې له مخې په هېواد کې حضور لري، نو له همدې امله به دوی د یوه منظم پلان پر بنسټ له افغان خاورې وځي. غني زیاته کړه: «هېڅ افغان نه غواړي چې بهرني ځواکونه د اوږدې مودې لپاره په افغانستان کې وي. خو دا چې دوی د یوه قرارداد له مخې دلته حضور لري، نو ځکه به د یوه منظم پلان له مخې له افغانستانه وځي او دا خاوره به پرېږدي.»
افغان ولسمشر دا ادعا هم وکړه، چې د سولې لپاره د امریکا له لوري د پيل شوو هڅو اصلي طرحه د افغان حکومت ده. د ده په خبره، امریکا د افغان حکومت د پلان له مخې یوازې د دې هڅه کوي چې د افغان حکومت او طالبانو ترمنځ د مخامخ خبرو زمینه برابره کړي. ولسمشر زیاته کړه چې اوربند، د ترهګرو د ملاتړو منزوي کول او د ترهګرۍ پر ضد د نړیوالو ګامونو اوچتول هغه طرحې دي چې د ملي یووالي حکومت جوړې کړې او له امریکا سره یې شریکې کړې دي.
ولسمشر بیا هم ټینګار وکړ چې افغان حکومت او ټول افغانان با عزته سوله غواړي او دوی هم د تدبیر او پلان له مخې غواړي چې عزتمنه سوله راشي او په دې توګه د هېواد ملي ګټې تظمین شي. هغه د افغان ځواکونو زړورتیا او لاس ته راوړنې هم وستایلې او په خبره یې د دوی د قربانیو له امله به افغانان سولې او دایمي ثبات ته رسېږي.
ولسمشر داسې مهال یادې څرګندونې وکړې چې نړیوالې رسنۍ او د مسایلو څارونکي افغان حکومت د سولې په خبرو کې منزوي بولي. د دوی په خبره، امریکا مخامخ له طالبانو سره خبرې کوي چې د همدې خبرو په لړ کې افغان حکومت په حاشیه کې ساتل شوی دی. افغان حکومت بیا وايي چې دوی په ټولو بحثونو او خبرو کې په جریان کې دي او هر څه له دوی سره په مشوره مخ ته روان دي.
