پخوانی امریکایی سفیر: دامریکايي ځواکونو بې وخته وتل به طالبان واک ته ورسوي

له افغانستانه د امریکایي ځواکونو بې وخته وتل به طالبان بېرته واک ته ورسوي. په افغانستان کې د امریکا پخواني سفیر راین کراکر د افغان جګړې په اړه په خپله وروستۍ مرکه کې ویلي چې افغانستان په حساس وضعیت کې دی او ددې اړتیا ده چې امریکا هر څه په دقیقه توګه و ارزوي. دده په خبره طالبان له افغان حکومت سره خبرې نه کوي، نو که له دغه ډلې سره دا هوکړه وشي چې امریکایي ځواکونه به له افغانستان وځي نو ښايي وسله وال طالبان واک ته د رسېدو هڅه وکړي او په دغه هېواد کې د جګړو بل پړاو پیل شي. کراکر زیاته کړې ده چې که په اتلسو میاشتو کې امریکایي ځواکونه له افغانستان وځي دا به هم د امریکا او هم د افغان حکومت لپاره خطرناک وي. دده په خبره طالبان اوس هم د افغانستان په ډېره برخه واک چلوي نو که له دغه هېواد بهرني ځواکونه وځي دوی به هڅه کوي چې د خپل واک ساحه پراخه کړي او افغانستان به یو ځل بیا د ترهګرو په ځاله بدل شي.