رویټرز: ایټالیوي ځواکونه له افغانستان وځي

ایټالیوي ځواکونه هڅه کوي په راتلونکي یوه کال کې له افغانستان خپل ځواکونه وباسي. رویټرز ته د ایټالیا په دفاع وزارت کې یوه باوري سرچینې وایي دفاع وزارت په افغانستان کې د خپلو ځواکونو حضور ارزوي. سرچینه وایي، د ایټالیا ددفاع وزیرې امر کړی چې ایټالیوي نظامیان دې په افغانستان کې د خپلو پوځيانو اوسنی حضور و ارزوي او تر یوه کال پورې یې دې د ایستلو پر لارو چارو غور وکړي. ایټالیا له پنځلسو کلونو راهیسې په افغانستان کې د ناټو تر چتر لاندې خپل پوځیان لري. دوی دمګړی د غوڅ ملاتړ ماموریت په چوکاټ کې د افغان پوځیانو روزنې او ملاتړ ته ادامه ورکوي. خو اوس دغه هېواد غواړي چې له افغانستان خپل پوځيان وباسي. رویټرز دا نه ده په ډاګه کړې چې د ایټالیا له لوري په افغانستان کې ددغه هېواد د پوځيانو ارزونه څه وخت پیل کېږي خو وايي چې تر راتلونکي کال پورې دلته شته عسکر ایستل کېږي.