له افغانستانه د امریکایي ځواکونو د وتلو له ګنګوسو سره سم، د دغه هېواد لوړپوړو پوځي چارواکو هم په دې اړه تازه څرګندونې کړې دي. دوی په افغانستان کې د سولې روانو هڅو ته هیله من دي او له افغانستانه د خپلو ځواکونو د وتلو مسئله هم نه ردوي. تېره ورځ د ناټو عمومي منشي ینس سټولټنبرګ امریکا ته تللی و او هلته یې د امریکا د دفاع له سرپرست وزیر سره ګډه خبري غونډه درلوده. د امریکا د دفاع سرپرست وزیر په دې خبري غونډه کې ویلي چې دوی د افغانستان د سولې روانو هڅو ته هیله من دي، ځکه د دوحې خبرې هڅوونکې وې.
پاتریک شاناهن ویلي، دوی هیله لري چې په افغانستان کې روانه جګړه د خبرو پر مټ حل شي او امریکا غواړي چې د سولې پروسه بریا ته ورسوي. د شاناهن په خبره، د امریکا ستره موخه دا ده چې په افغانستان کې ثبات ټینګ شي. له همدې امله د سولې روانو خبرو او هلو ځلو ته هیله من دي. شاناهن همدا راز ویلي چې که له طالبانو سره سوله وشي، نو امریکايي ځواکونه به له افغانستانه ووځي، خو تر دې دمه په رسمي توګه ورته د سرتېرو د ایستلو امر نه دی شوی. نوموړي زیاته کړې: «په افغانستان کې د سولې په برخه کې وروستي پرمختګونه هڅوونکي دي. موږ تمه لرو چې دغه پروسه بریا ته ورسېږي. له طالبانو سره د سولې په اړه راته ویل شوي، ښایي داسې روغه جوړه رامنځ ته شي چې په پایله کې به یې امریکایي ځواکونه له افغانستانه ووځي، خو تر دامهاله موږ ته د ټولو ځواکونو د وتلو امر نه دی شوی.»
په ورته وخت کې د ناټو عمومي منشي ینس سټولټنبرګ هم په دې غونډه کې د خبرو پر مهال ویلي، چې ناټو تر دې دمه له افغانستانه د خپلو ځواکونو د وتلو په اړه پرېکړه نه ده کړې. د نوموړي په خبره، ناټو نه غواړي چې د ټول وخت لپاره په افغانستان کې پاتې شي، خو دا هم نه غواړي چې له دغه هېواد په وتلو کې بیړه وکړي. د ده په خبره، د افغانستان د سولې مسئله مهمې مرحلې ته رسېدلې ده، نو ټول اړخونه هڅه کوي چې هر ګام په پوره دقت او تر هر اړخیزې ارزونې وروسته اوچت کړي.
سپینه ماڼۍ بیا ویلي چې د افغانستان سوله او ثبات د دوی لپاره لومړیتوب دي. د سپینې ماڼۍ ویاندې سارا سندرز پرون له خبریالانو سره د خبرو پر مهال د یوې پوښتنې په ځواب کې ویلي، چې د افغانستان سوله د امریکا د حکومت لپاره لومړیتوب لري او په دې برخه کې جدي هڅه کوي. د نوموړې په خبره، د سولې خبرو ته هیله من دي او د دې تمه ده چې په افغانستان کې روانه جګړه د خبرو له لارې حل شي.
بل پلو په افغانستان کې د امریکا پخواني سفیر رایان کراکر بیا ویلي، چې تر وخت مخکې له افغانستانه د سرتېرو ایستل به طالبان پیاوړي کړي. د نوموړي په خبره، طالبان اوس هم د افغانستان پر ډېره خاوره واک چلوي، نو که تر وخت مخکې امریکايي ځواکونه له افغانستانه ووځي، د دې احتمال شته چې دغه ډله پیاوړې شي او ځان واک ته ورسوي. رایان کراکر پر امریکايي حکومت غږ کړی چې د سولې او په دغه هېواد کې د جګړې د پای ته رسولو او یا سرتېرو د ایستلو په اړه هر ګام په پوره دقت پورته کړي او دلته روانه جګړه د تل لپاره ختمه کړي.
د پخوانیو او اوسنیو امریکايي چارواکو ترڅنګ په سیمه کې هم د مسایلو څارونکي او نړیوالې رسنۍ په افغانستان کې د روانې جګړې او سولې په اړه تحلیلونه خپروي. ډېری دا وېره لري چې په افغانستان کې به د سولې روانې هڅې او د بهرنیو ځواکونو وتل د ستونزو یو نوی پړاو پیل کړي، خو امریکايي حکومت وايي چې دوی غواړي په افغانستان کې د ۱۷ کلونو روانه جګړه د خبرو له لارې حل کړي او بین الافغاني مذاکراتو ته زمینه برابره کړي.
