واشنګټن ایکزماینر: ټرمپ ته سوله مهمه نه ده، خپل ځواکونه له افغانستان وباسي

ټرمپ ته مهمه نه ده، چې د سولې خبرې پایلې ته رسېږي کنه، خو هغه به خپل سرتېري له افغانستان وباسي. واشنګټن ایکزماینر نشریه په خپله یوه مقاله کې د افغانستان د جګړې په اړه وايي چې امریکا هر کال د میلیاردونو ډالرو په لګولو په دې بریالۍ نه شوه، چې دغه جګړه کابو کړي او په افغانستان کې یو پياوړی پوځ جوړ کړي. په مطلب کې راځي د امریکایانو میلیاردونه ډالر په افغانستان کې ولګېدل خو نه ترهګري ختمه شوه او نه هم له فساد پاک افغان پوځ جوړ شو. سرچینه کاږي نو له همدې امله د ټرمپ حکومت په امریکا کې تر سخت فشار لاندې دی چې په افغانستان کې دې بېځایه لګښتونه او بې ګټې نظامي حضور پای ته ورسوي. واشنګټن ایکزماینر لیکي ټرمپ به دې ته په تمه نه شي چې د سولې خبرې پایلې ته رسېږي کنه، بلکې هغه به د سرتېرو په ایستلو ټینګار وکړي د خپلو پوځيانو د وتلو پر لارو چارو به فکر وکړي.