د صالح د څرګندونو خلاف ؛ ولسمشر غني وايي د سولې کيلي افغانستان کې ده

ولسمشر غني نن کابل د لویې جرګې په خیمه کې د خبرو پر مهال وویل چې د سولې خبرې د تړلو دروازو شاته له یوې و ړې ډلې سره روانې دي چې هیڅ ښه پایله به ونه لري. نوموړي ویلي افغانان سوله غواړي خو دا سوله باید پایداره او هر اړخیزه وي. نوموړي ویلي چې نړیوال بنسټونه د سولې برخه کې بریالۍ تجربه نه لري. غني د ټاکنو کمیسیون کې اصلاحاتو ته په اشارې وویل چې په یاد کمیسیون کې به پراخ او بنسټیز اصلاحات رامنځته، قانون به تعدیل او راتلونکو ټاکنو کې باید ټولې رایې بایومتریک شي. هغه دغه راز د خپلو خبرو پر دوام وویل چې د راتلونکو ولسمشریزو ټاکنو پایلې به په دوه ورځې کې له خلکو سره شریکې شي. هغه د امرالله صالح د هغې خبرې پر خلاف چې ویلي یې وو د سولې کیلي په کابل کې نه، بلکې راولپنډۍ کې ده ویلي، د سولې کیلي په افغانستان کې ده ځکه دوی د سولې لپاره طرحه او برنامه لري. هغه دغه راز زیاته کړې چې د جنګ کیلي په پاکستان کې ده ځکه په خبره یې وسله والې ډلې هلته دي او یاد هېواد یې ملاتړ کوي. دا په داسې حال کې ده چې خلیلزاد څو ورځې وړاندې د قطر په پلازمینه دوحه کې له طالبانو سره تر خبرو وروسته کابل ته راغی او د سولې برخه کې یې مهم پرمختګونه له افغان حکومت سره شریک کړل چې له هغه وروسته د ولسمشر دریځ کې یو لړ بدلونونه او خبرو کې توندوالی معلومېږي.