ټرمپ ته د ولسمشر غني لیک: موږ به په لګښتونو کې سپما وکړو، خو سرتېري مه وباسه!

ولسمشر غني له امریکا غوښتي چې خپل سرتېري دې له افغانستان څخه نه وباسي. نیویارک ټایمز ورځپاڼې هغه لیک ته لاسرسی پیدا کړی چې د سه شنبې په ورځ ولسمشر غني او د هغه شاوخوا کسانو د آلیس ویلز په لاس د امریکا ولسمشر ډونالډ ټرمپ ته لېږلی دی. نیویارک ټایمز لیکي ولسمشر غني د امریکايي ځواکونو له وتلو سخت وېرېدلی دی او له دې اړخه ډېره اندېښنه لري. سرچینه کاږي ولسمشرغني ډونالډ ټرمپ ته ویلي چې خپل سرتېري دې په بشپړه توګه له افغانستان څخه نه وباسي او په مقابل کې یې ژمنه کړې چې د امریکایي ځواکونو په لګښتونو کې به ۲ میلیارده ډالر سپما کوي او امریکا کولی شي د سرتېرو شمېر تر ۳ زره را ټيټ کړي. نیویارک ټایمز لیکلي ولسمشر غني وېرېدلی دی او غواړي امریکا یې تر څنګ وي. سرچینه لیکي ولسمشر همدا راز باوري دی چې د امریکا له مرستې پرته بل ځل واک ته نه شي رسېدلی او که د سولې خبرې یوې پایلې ته رسېږي نو ښايي بیا هم ولسمشر غني ولسمشرۍ ته و نه رسېږي. نیویارک ټایمز وایي کله چې امریکایي ځواکونه له عراق وتل، نو عراقي چارواکو ددې کار هرکلی کاوه، خو برعکس ولسمشر غني بیا په دې خواشینی دی. د ولسمشر غني مخالفان په ځانګړې توګه حنيف اتمر نوموړی د سولې د خبرو په سبوتاژ تورنوي. ددوی په خبره غني او ډله یې هڅه کوي د سولې خبرې ناکامې کړي، ځکه دوی باوري دي چې د سولې په کېدو سره به ولسمشرغني واک له لاسه ورکړی. دوی همدا راز ولسمشر غني تورن کړی چې د ملي ګټو پر ځای شخصي ګټو او د واک دوام ته ارزښت ورکوي.