سولې شورا: د سولې ادبیات مهم دي او باید ورته جدي پاملرنه وشي

د سولې عالي شورا وایي په هېواد کې د سولې د ټینګښت لپاره د جګړې ښکېلو اړخونو ته د سولې ادبیات ډېر مهم دي او ټینګار کوي چې روان نازک وضعیت ته په پام باید دې موضوع ته جدي پاملرنه وشي. د یادې شورا د اجراییه پلاوي غړی قاضي محمد امین وقاد وایي، هر هغه لفظ چې کرکه پیدا کوي ګټه نه لري او باید ترې ډډه وشي. وقاد دا خبرې په داسې حال کې کوي چې ولسمشر غني په دې وروستیو کې وسله والو طالبانو ته تونده لهجه کارولې او ویلي یې دي چې له یو اقلیت سره د پردې تر شا د سولې خبرې به کومه پایله ونه لري او باید د بهرنیانو له ولکې ځانونه ازاد کړي. په ورته وخت کې افغان حکومت او وسله والو طالبانو تل یو بل لاس پوڅي ګڼلي او اوس چې د سولې لپاره تر بل هر وخت هڅې ګړندۍ شوې لا هم دغه وضعیت حاکم دی او یو د بل پر وړاندې توندې څرګندونې کوي.