ایرو ایشیا: افغان ستونزه؛ یوازې د پاکستان، طالبانو او امریکا ترمنځ د حل وړ نه ده

د افغانستان ستونزه یوازې د امریکا، پاکستان او طالبانو تر منځ د خبرو له لارې د حل وړ نه ده. ایرو ایشیا رېویو په یوه مقاله کې وایي په دې وروستیو کې د سولې خبرو په افغانستان کې سختې اندېښنې راولاړې کړې دي. سرچینه وایي امریکا په دې باوري ده او په دې اړه کره اسناد او ثبتونه هم لري چې پاکستان د طالبانو ملاتړی دی او ددغه ډلې پرمټ په سیمه کې خپلې موخې تعقیبوي نو بیا ولې له طالبانو سره د پاکستان په حضور کې خبرې کوي. سرچینه کاږي طالبان د پاکستان په اشاره جګړه کوي او د سولې خبرې هم ددوی په اشاره مخ ته وړي نو امریکا ته په کار ده، چې په هر ډول خبرو او مذاکراتو کې افغان حکومت ته د ګډون زمینه برابره کړي او د افغان چارواکو په حضور کې له طالبانو سره خبرې وکړي. نشریه کاږي تر هغه چې افغان حکومت د مذاکراتو یو لوری نه وي نو د افغانستان د سولې خبرې دغه هېواد لسیزو پخواني حالت ته بیايي او د نارامیو او جګړو یو بل پړاو ته لار پرانیزي. په مطلب کې راځي بریالۍ سوله به هغه وي چې طالبان افغان حکومت د یوه رسمي حکومت په څېر وپېژني او له دغه حکومت سره مخامخ خبرې وکړي.