د ۱۳۹۸ کال د ولسمشریزو ټاکنو لپاره د نوماندانو د ګډو هڅو شورا د ۱۳۹۷ کال د سلواغې د میاشتې په ۱۱ مه نیټه ناسته وکړه.
په دې ناسته کې دعادلانه، شفافو او له هر ډول فساد څخه د خوندي ټاکنو د تر سره کیدو په منظور پر دوو مهمو سندونو بحث او د نظرونه تبادله وشوه.
لومړی سند د سیاسي او ټاکنیزو فعالیتونو په موخه له دولتي صلاحیتونو، منابعو او امکاناتو څخه د ناوړه ګټه اخیستنې د مخنیوي پیشنهادي طرزالعمل و، چې په دې کې د ولسمشر او اجرائیه رییس په ګډون د ۱۳۹۸ کال د ولسمشرۍ د ټولو نوماندانو لپاره اخلاقي او الزامي اصول ټاکل شوي. نوموړی طرزالعمل د ولسمشریزو ټاکنو زیاتره نوماندانو تایید کړی او په رسمي توګه ولسمشرۍ ریاست ته استول شوی دی.
دویم سند په ټاکنیز سیستم کې د اصلاحاتو طرحه وه، چې تیرو تجربو ته په کتو سره یې لومړنۍ مسوده چمتو شوې وه، بررسي او وڅیړل شوه.
د ټاکنیزو اصلاحاتو د طرحې مطابق د ولسمشریزو ټاکنو د نوماندانو د ګډو هڅو شورا پریکړه وکړه، چې حکومت نه شي کولی پرته د نوماندانو له مشورې د اصلاحاتو په نوم په ټاکنیز سیستم کې یو اړخیزه او خپلسري مداخله وکړي.
د ګډو هڅو شوار هیله دا ده چي، جلالتمآب جمهور رییس وړاندیز شوی طرزالعمل د سالمې سیالۍ او اخلاقي اصولو د رعایت په هدف تایید او وضع کړي.
همدارنګه هیله ده، د ټاکنو د بهیر په رابطه هر ډول تصمیمونه د ګډو هڅو له شورا سره په مشوره صورت و نیسي.
موږ له نړیوالې ټولنې څخه هم غوښتنو کوو، چې د خپلو مسوولیتونو په پام کې نیول سره له یادو سندونو څخه ملاتړ وکړي.
