په دې وروستیو کې د امریکایي ځواکونو د وتلو له ګنګوسو سره سم، په کور دننه د ځینو سیاستوالو اندېښنې او پوښتنې هم ډېرې شوې دي. ډېری سیاستوال او د ملي یووالي حکومت چارواکي په دې اند دي چې په افغانستان کې د بهرنیو ځواکونو حضور د حکومت په ګټه دی او وتل به یې هېواد له ناامنیو او جګړو سره لاس او ګرېوان کړي.
له دې ډلې د سولې عالي شورا د دارالانشا رییس محمدعمر داوودزي، په خپله نوې مرکه کې ویلي چې بهرني ځواکونه دې د بیړې پر ځای، د یوه منظم پلان له مخې له افغانستانه ووځي. د نوموړي په خبره، د یوه پلان له مخې او په منظمه توګه د امریکايي ځواکونو وتل د افغانستان پر وضعیت منفي اغېز نه شي لرلی، خو په دې برخه کې بیړه به هېواد د خونړیو جګړو پر ډګر بدل کړي. نوموړي زیاته کړې: «که له افغانستانه د بهرنیو ځواکونو وتل له کوم مهالوېش پرته ترسره شي، یوه ستره تشه به رامنځ ته شي او په پایله کې به یې افغانستان د خونړیو جګړو پر ډګر بدل شي».
نوموړي له سي ان ان سره په تازه مرکه کې ویلي، امریکا ته پکار ده چې په افغانستان کې روان وضعیت په دقیقه توګه وارزوي او تر ارزونې وروسته د خپلو ځواکونو د وتلو په اړه پرېکړه وکړي. د داوودزي په خبره، د بهرنیو ځواکونو ناڅاپي او بې پلانه وتل دلته تشه رامنځ ته کولی شي او دا تشه ناامنیو او بې ثباتیو ته لار هواروي.
د سولې شورا دغه لوړپوړي چارواکي پر بینالافغاني مذاکراتو ټينګار کړی دی او په خبره یې په هېواد کې روانه جګړه یوازې او یوازې د خبرو او مذاکراتو پر مټ د حل وړ ده. د هغه په خبره، دا مذاکرات باید د افغانانو په مشرۍ او مالکیت ترسره شي. نوموړي همدا راز ویلي چې طالب مشران هم له افغان حکومت سره خبرو ته لېواله دي، خو وېره لري چې له افغان حکومت سره خبرو ته د طالب مشرانو حاضرېدل به د دې ډلې د جنګیالیو روحیه کمزورې کړي. داوودزي زیاته کړې: «زه فکر کوم د طالبانو مشران له دې وېره لري، چې د امریکا له لوري د سرتېرو د ایستلو مهالوېش تر اعلان وروسته، که دوی له افغان لوري سره خبرو ته کېني، دا کار به د جګړې په لیکو کې د هغوی د قوماندانانو او جنګیالیو پر روحیه منفي اغېز وکړي او هغوی ښايي داسې و انګېري چې ولې موږ جګړه کوو، په داسې حال کې چې تاسو خبرې کوئ.»
عمر داوودزی داسې مهال دغه څرګندونې کوي چې د امریکا ولسمشر ډونالډ ټرمپ یو ځل بیا د سرتېرو د ایستلو په اړه له خپلې پرېکړې دفاع کړې ده. هغه په خپلو تازه څرګندونو کې ویلي چې د ټاکنیزو کمپاینونو پر مهال یې ژمنه کړې وه، چې په ټولو هېوادونو کې به د امریکا جګړې ختموي. د نوموړي په خبره، اوس د دې وخت دی چې پر خپله ژمنه عمل وکړي او له افغانستان او سوریې خپل ځواکونه وباسي.
نوموړي د افغانستان او سوریې جګړه پېچلې بللې ده او په خبره یې په دغو جګړو کې نه د ناندریو د ختمېدو پای ښکاري او نه هم د لګښتونو د پای ته رسېدو کوم څرک شته. ټرمپ ویلي، امریکا هر کال د افغانستان پر جګړه تر پنځوس میلیارده پورې ډالر لګوي، نو د دې اړتیا ده چې د امریکا پر ولس د دې جګړې بار راکم کړي.
بل پلو بیا د نیویارک ټایمز د راپور له مخې، ولسمشر محمد اشرف غني له ټرمپه غوښتي چې خپل ځواکونه دې له افغانستان څخه نه وباسي. ده دې سرتېرو او لګښتونو په کمولو کې د همکارۍ ژمنه هم ورکړې ده، خو ټینګار یې کړی چې امریکايي ځواکونه دې په دې حساسو شرایطو کې د بې پلانه وتلو پرېکړه نه کوي.
