سیګار: طالبان هر کال له نشه يي توکو ۴۰۰ میلیونه ډالر ګټي

وسله وال طالبان هر کال د نشه يي توکو د کاروبار له کبله ۴۰۰ میلیونه امریکايي ډالر ګټي. سیګار په یوه تازه خپاره کړي راپور کې ویلي چې د میلیاردونو ډالرو په لګېدو لا هم افغانستان د نشه يي توکو تر ټولو ستر تولیدوونکی هېواد دی. ددغه بنسټ په راپور کې راځي سره له دې چې افغان حکومت او ناټو د نشه يي توکو د کاروبار او کښت پر وړاندې د مبارزې خبره کوي خو لا هم دوی په دې کار کې بریالي شوي نه دي. په راپور کې راځي چې له درېیو یوه برخه نشه يي توکي د حکومت تر کنټرول لاندې سیمو کې کرل کېږي. همدا راز د طالبانو تر حاکمیت لاندې سیمو کې بیا پر ۱۲۳ زره هکتاره ځمکه نشه يي توکي کرل کېږي. سیګار زیاتوي چې طالبان خپل ۶۰ سلنه لګښتونه د نشه یي توکو د کښت او قاچاق له درکه ترلاسه کوي او هر کال تر ۴۰۰ میلیونه ډالرو پورې له دې درکه ګټه کوي.