شینواري: طالبان دې بین الافغاني مذاکراتو ته غاړه کېږدي

د ننګرهار شپږو ولسواليو کې د شينوارو قوم د يوې لويې غونډې پرمهال له طالبانو سره د سولې له روانو هڅو ملاتړ وکړ او پر طالبانو يې غږ وکړ چې بين الافغاني سولې ته غاړه کېږدي. دغه سلګونه قومي مشران، ديني عالمان، ځوانان او يو شمېر نور کسان د غني خېلو په ولسوالۍ کې راټول شوي وو او د سولې راتګ ته يې هيله مندي وښوده. د دغې غونډې پرمهال قومي مخورو، علماء کرامو او ځوانانو له حکومت او وسله والو طالبانو وغوښتل، چې ژر تر ژره د اوربند تر څنګ د تفاهم په ترڅ کې سوله وکړي. په ولسي جرګه کې د ننګرهار د خلکو استازي عصمت الله شينواري وويل، چې د شينواري قوم په روانه جګړه کې سخت زيانونه ليدلي او پر ښکېلو خواوو غږ کوي، چې د دې خاورې د تلپاتې ثبات او پرمختګ په موخه سوله وکړي. د شینوارو قومي مشر ملک عثمان د جګړې پر ښکېلو غاړو غږ کوي چې سولې ته دې په واقعي معنا کار وکړي او پر حکومتي مشرانو غږ کوي چې سوله دې د څوکۍ او سیاستونو ښکار نه کړي.