وروسته له دې چې په روانه اونۍ کې په مسکو کې د جوړېدونکې غونډې په اړه غبرګونونه وپارېدل، دغه پلاوي یوه ګډه اعلامیه خپره کړې ده. په اعلامیه کې راغلي چې دوی د مشهورو کسانو، د ولسي جرګې له استازو، قومي مشرانو، سیاسي احزابو او سیاسي جریانونو یو ګډ پلاوی دی او د مسکو په غونډه کې به ګډون کوي.
په اعلامیه کې راغلي چې دغه غونډه د بین الافغاني مذاکراتو د پيل لپاره لومړی ګام دی او دوی به د هېواد د ژغورلو لپاره د مسکو په غونډه کې ګډون کوي. سرچینه کاږي چې دغه غونډه په روسیه کې د مېشتو افغانانو د ټولنې له لوري جوړه شوې ده چې له همدې امله د افغانستان ټولو سیاسي څېرو پکې ګډون ته زړه ښه کړی دی. په اعلامیه کې راځي چې «په هېواد کې روان وضعیت او هغه حرکتونو ته په کتو چې د سولې په برخه کې رامنځ ته شوي، د مسکو غونډه به لومړنی ګام وي چې د بین الافغاني مذاکراتو لپاره اخیستل کېږي. په مسکو کې د مېشتو افغانانو دغه کار د قدر وړ دی او موږ یې هر کلی کوو. دا چې افغان ملت تر بل هر وخت سولې ته لېواله دی او د سولې تنده لري، نو زموږ هیئت به هم په دې حساسو شرایطو کې خپل تاریخي مسوولیت ادا کړي.»
د ګوندونو او سیاسي جریانونو استازو په دغه ګډه اعلامیه کې ویلي، افغان حکومت د دې پر ځای چې د دوی هڅې زیانمنې کړي، باید ملاتړ یې وکړي او دغه مهمې غونډې ته دې خپل یو باصلاحیته پلاوی ولېږي. په اعلامیه کې راغلي چې دوی د بین الافغاني مذاکراتو لپاره زمینه برابروي او په دې توګه غواړي، څو په دغو حساسو شرایطو کې په سیمه کې له روانو ناندریو افغانستان وژغوري. اعلامیه کې راغلي: «په دغه غونډه کې زموږ موخه دا ده، چې زموږ ملي ارزښتونه وساتل شي، سوله د افغانانو ترمنځ د خبرو له لارې تامین شي، ملي او امنیتي بنسټونه تقویه شي، د افغانستان د اسلامي جمهوریت اوسنی نظام وساتل شي او د پياوړتیا لپاره یې ژمنې وشي او همدا راز د افغان سولې لپاره سیمه ییزه اجماع پياوړې شي.»
ګډونکوونکي پلاوي د خپلو خبرو په ادامه ویلي، چې په مسکو کې رامنځ ته شوی فرصت د افغان سولې لپاره خورا مهم دی او هیله لري چې د دغه بهیر په رامنځ ته کېدو او دوام سره د افغانستان ستونزه د تل لپاره حل شي.
بل پلو افغان حکومت بیا وار د مخه په دغه غونډه کې د نه ګډون پرېکړه کړې ده. د هېواد د بهرنیو چارو وزارت د مسکو د غونډې په اړه په خپل غبرګون کې ویلي وو، چې په دغه غونډه کې به د افغان حکومت کوم پلاوی ګډون نه کوي.
د سولې عالي شورا بیا وايي، د هر هغه ګام هر کلی کوي چې له مخې یې په افغانستان کې سوله او ثبات ټېنګېدلی شي. د سولې عالي شورا ویاند سید احسان طاهري وایي، د افغانستان ستونزه د خبرو له لارې د حل وړ ده او د سولې عالي شورا د ټولو هغو هڅو ملاتړ کوي چې په پایله کې یې په افغانستان کې خونړۍ جګړه پای ته رسېږي او دایمي سوله راځي.
د سولې په اړه په وروستیو پیل شوو هڅو کې ولسمشر غني تېره ورځ په خپلو تازه څرګندونو کې ویلي وو، چې دی یوازې د با عزته او دایمي سولې هوکړه لاسلیکوي. د نوموړي په خبره، هېڅ وخت به د سولې هغه هوکړه لاسلیک نه کړي چې پکې د افغانانو او افغان حکومت حیثت خوندي نه وي او د نورو په خوښه راغلې وي.
