نیویارک ټایمز: ددې وخت دی چې امریکايي ځواکونه خپل هېواد ته ستانه شي

اوس ددې وخت دی چې په افغانستان کې د امریکا جګړه ختمه شي او ټول سرتېري خپلو کورونو ته ستانه شي. امریکایي ورځپاڼه نیویارک ټایمز وایي په افغانستان کې د امریکا جګړه په لوړه بیه تمامه شوې ده نو ددې وخت دی چې دغه جګړه د خبرو له لارې حل شي او ټول امریکایي سرتېري خپلو کورونو ته ستانه شي. په مقاله کې راځي چې ټرمپ هم د سرتېرو ایستلو ته تیار دی خو ځینې مسایل دي چې باید په پام کې ونیول شي. نیویارک ټایمز وایي دا وېره شته چې افغانستان د امریکايي ځواکونو تر وتلو وروسته د کورنۍ جګړې په ډګر بدل شي نو امریکا ته په کار ده، چې هر ګام په پوره دقت او تدبیر واخلي. ورځپاڼه همدا راز لیکي که د افغانستان سیمه ییز ګاونډیان او یا سیمه ییز لوبغاړي لکه پاکستان، روسیه، ایران او چین په صداقت د افغان حکومت د ملاتړ لپاره کار وکړي نو کولی شي طالبان د سولې خبرو ته حاضر کړي او په دې توګه په افغانستان کې اوولس کلنې لاس ته راوړنې وساتل شي. ورځپاڼه لیکي له دې ټولو سره سره ددې وخت دی چې امریکايي ځواکونه له افغانستان و ایستل شي او ددغه هېواد د ثبات لپاره سیاسي حللارې ولټول شي.