تېره ورځ په مسکو کې د افغان سولې په اړه د افغان سیاسیونو او طالبانو ترمنځ دوه ورځنۍ غونډه پیل شوه. په دغه غونډه کې لومړی پخواني ولسمشر حامد کرزي ورپسې طالب استازي شیرعباس ستانکزي او بیا نورو سیاستوالو خبرې وکړې. په دغه غونډه کې پرون د افغانستان د روانې جګړې پر بېلو اړخونو خبرې وشوې او ګډونوالو اوسنۍ جګړه پر افغانانو تپل شوې جګړه بللې ده او د بین الافغاني مذاکراتو پر مټ یې د دغه جګړې پر پای ته رسولو ټینګار کړی دی.
پخواني ولسمشر حامد کرزي دغه غونډې ته د خبرو پر مهال وویل، چې د افغانستان جګړه یوازې او یوازې د خبرو له لارې د حل وړ ده او ټولو اړخونو ته پکار ده، چې د خبرو له لارې او د پردیو له مداخلې پرته روانه جګړه پای ته ورسوي. د نوموړي په خبره، په هېواد کې روانه جګړه پردۍ او پر افغانانو تپل شوې جګړه ده چې یوازې او یوازې افغانان دغه جګړه پای ته رسولی شي.
طالب استازي بیا پر خپلو خبرو ټینګار کاوه او په خبره یې لومړنی شرط یې له افغانستانه د بهرنیو ځواکونو وتل دي او وروسته بیا د باور جوړولو په موخه د طالب زندانیانو خوشي کول، له تور لېست د طالب زندانیانو ایستل او دې ته ورته مسایل هغه شرطونه دي چې طالبانو د سولې لپاره وړاندې کړي دي. شیرعباس ستانکزي همدا راز په غونډه کې د خبرو پر مهال وویل، چې دوی په افغانستان کې د اساسي قانون د تعدیل او همدا راز د یوه اسلامي نظام د جوړېدو غوښتونکي دي. نوموړي پر اساسي قانون نیوکه وکړه او په خبره یې دوی د اساسي قانون غوښتونکي دي، خو دغه قانون باید تعدیل شي.
د پخواني ولسمشر لومړي مرستیال محمد یونس قانوني هم په دغه غونډه کې د خبرو پر مهال وویل، چې افغانستان په سیمه کې تر ټولو غوره اساسي قانون لري او همدا راز په سیمه کې تر ټولو ښه ولسواک اسلامي نظام لري او ټول باید د دغه نظام د پیاوړتیا لپاره کار وکړي. د نوموړي په خبره، دا سمه ده چې اساسي قانون او اوسنی نظام یو څه ستونزې لري او باید اصلاح شي، ځکه دغه موارد له اصلاح مستثنی نه دي. د قانوني په خبره، روانه جګړه یوازې د خبرو له لارې حل کېدلی شي او هغه ډلې چې خبرو ته نه حاضرېږي، د افغانستان د شاتګ او په هېواد کې د نورو د مداخلو سبب ګرځي.
د اجرایه رییس دویم مرستیال محمد محقق هم په دې غونډه کې خبرې وکړې. هغه وویل چې په افغانستان کې روانه جګړه نه قانوني او نه هم شرعي اړخ لري. د نوموړي په خبره، روانه جګړه د مسلمانو وروڼو ترمنځ ده چې هېڅ ډول قانوني او اسلامي توجیه نه لري.
د مسکو غونډه پرون پیل شوې ده او نن به هم په یاد ښار کې ادامه ولري. دغه غونډه په افغانستان کې له ډېرو غبرګونونو سره مخ شوې ده. خو د ټولنیزو رسنیو ډېری کاروونکي په دې باور دي چې افغان جګړه یوازې د خبرو له لارې د حل وړ ده، نو ښه به وي چې د افغان جګړې د پای ته رسولو په موخه د ښکېلو اړخونو ترمنځ د ناندریو پر ځای مذاکرات ادامه پیدا کړي.
بل پلو ولسمشر غني هم پر دغه غونډه غبرګون ښودلی دی. هغه له یوې رسنۍ سره په خبرو کې ویلي، افغان حکومت د سولې خبرې پيل کړې دي، وسله والو طالبانو ته واضح وړاندیز لري، طالبان د افغان حکومت وړاندیز نه مني، نو په داسې یوه حالت کې د مسکو غونډه بې مانا ده. د ده په خبره، افغان حکومت سولې ته ژمن دی، خو د هغه نظام ساتنه هم د اوسنیو چارواکو دنده ده چې د زرګونو افغانانو د وینو په بیه جوړ شوی دی.
