پمپیو: تر دایمي سولې پورې به د کابل واشنګټن نظامي اتحاد دوام کوي

دامریکا د بهرنیو چارو وزیر ولسمشر اشرف غني ته ډاډ ورکړ، چې تر تلپاتې سولې پورې به د افغانستان او امریکا د حکومتونو ترمنځ نظامي اتحاد پر ځای وي. د ولسمشر ویاند هارون چخانسوري ویلي، چې ولسمشر محمداشرف غني پرون ماښام د امریکا د متحدو ایالتونو د بهرنیو چارو له وزیر مایک پمپیو سره د ټلیفوني خبرو له لارې د دواړو هېوادونو ترمنځ په دوامدارو همکاریو، د سولې پر پروسې او را روانو ټاکنو خبرې وکړې. پمپیو ویلي ابهامات معمولا د ځینو خبرو او ګنګوسو نه پیدا کېږي، خو دا ګنګوسې د عمل ځای نشي نیولی او د دواړو هېوادونو ترمنځ مناسبات مستحکم دي. د امریکا د بهرنیو چارو وزیر زیاته کړه، د دوامدارې سولې تر راتګ پورې به د امریکا او افغانستان ترمنځ نظامي اتحاد پر خپل ځای وي. همدارنګه پمپیو په افغانستان کې د سولې پروسې په اړه وویل، د امریکا د متحدو ایالتونو دولت د افغانستان د اسلامي جمهوري دولت تر محوریت لاندې د سولې مذاکراتو ملاتړ کوي. د امریکا د بهرنیو چارو وزیر په ټاکلي وخت د افغانستان د جمهوري ریاست د را روانو ټاکنو ملاتړ وکړ.