ټرمپ: د افغان جګړې د ختمولو لپاره مې مذاکرات چټک کړي دي

ټرمپ وایي د افغان جګړې د سیاسي حل لپاره یې مذاکرات چټک کړي دي. د امریکا ولسمشر ملت ته په کلنۍ وینا کې د خبرو پر مهال وویل، چې په افغانستان کې د خپلو سرتېرو د کمولو په اړه جدي دی. دده په خبره له همدې امله یې د سولې مذاکرات چټک کړي دي او هڅه کوي د افغانستان د جګړې ختمولو ته سیاسي حل پیدا کړي. هغه دا نه دي ویلي چې ټول سرتېري به له افغانستان وباسي، خو وایي په دغه هېواد کې به د خپلو عسکرو شمېر کموي او د سولې مذاکرات به ارو مرو یوې پایلې ته رسوي. ولسمشر ټرمپ وویل، د امریکا جګړه په منځني ختیځ، افغانستان او عراق کې ۱۹ام کال ته ننوتې ده او اوس ددې وخت دی چې د پای ته رسولو لپاره یې کار وشي. ټرمپ ویلي، په ۱۹کلنه جګړه کې ۷ زره امریکايي عسکر وژل شوي، ۵۲ زره نور ټپیان او معیوب دي او امریکا پر دغه جګړه ۷ ټرېلیونه ډالر لګولي دي. ټرمپ ټینګار کړی چې دغه لګښتونه باید کم شي او امریکا به خپلې جګړې د سیاسي مذاکراتو پر مټ حل کوي.