میدان وردګ؛ زندانیانو ته د لومړي ځل لپاره کتابتون پرانیستل شو

دغه کتابتون د وردګو ولایت د یوه فعال ځوان مجیب الرحمن محمودي په هڅو او زیار برابر شوی دی. هغه ددغه کتابتون د پرانیستې پر مهال وویل، چې د ملګرو په همکارۍ یې کتابونه ټول کړي دي او موخه یې دا ده، چې وکولی شي د کتابلوستنې فرهنګ عام کړي، د ولس فکر بدل کړي او په ټولنه کې د مثبتو بدلونونو سبب شي. د وردګو ولایت والي ډګر جنرال مظفرالدین یمین هم د مجیب الرحمن محمودي ددغه مثبت ګام هرکلی وکړ او په خبره یې په ورته خیریه کارونو سره په ټولنه کې د پرمختګ او فکري بدلون زمینه برابرېدلی شي. د وردګو ولایت د ځايي چارواکو په وینا دا لومړی ځل دی چې په دغه ولایت کې د زندانیانو لپاره کتابتون پرانیستل کېږي.