ارګ: د طالبانو تشدد د بهرنیو ځواکونو د حضور زمینه برابره کړې ده

د طالبانو له لوري د تاوتریخوالي دوام په افغانستان کې د بهرنیو ځواکونو حضور ته زمینه برابره کړې ده. د ولسمشر ویاند هارون چخانسوري له رسنیو سره په خبرو کې ویلي، افغان حکومت هم دا غواړي چې بهرني ځواکونه له افغانستان ووځي، هېواد پر ځان بسیا شي او دلته دایمي سوله ټینګه شي. دده په خبره په ۲۰۱۴ کال کې ټاکل شوې وه، چې د بهرنیو عسکرو شمېر صفر ته راښکته شي، خو د وسله والو طالبانو، جګړې، تشدد او تاوتریخوالی ددې سبب شو، چې دوی خپل حضور ته ادامه ورکړي. چخانسوري وایي، اوس هم که طالبان جګړو ته ادامه ورکوي نو ددې تمه دې نه لري چې بهرني ځواکونه دې له افغانستان ووځي. هغه یو ځل بیا پر طالبانو غږ وکړ، چې د سولې له پروسې سره یو ځای شي، له جګړو لاس واخلي او له افغان حکومت سره د مخامخ مذاکراتو له لارې په هېواد کې د بهرنیو ځواکونو حضور ته د پای ټکی کېږدي.