شکېب: د افغان کډوالو ایستل د پاکستان یو اړخیزه پرېکړه ده

په اسلام‌اباد کې د افغانستان سفیر سردار احمد شکېب ویلي، چې افغان کډوال په پاکستان کې د پام وړ شتمنۍ، پانګونې او ملکیتونه لري او له اسلام‌اباده یې غوښتي چې د دغو شتمنیو د راټولولو او یا پلورلو لپاره ورته کافي وخت ورکړل شي. نوموړي ټینګار کړی، چې د افغانانو د ایستلو پرېکړه د پاکستان له لوري یو اړخیزه ده. شکېب په یوه مرکه کې ویلي، چې ډېری افغانانو ته اجازه نه ورکول کېږي څو خپل مالونه له ځانه سره یوسي او په لنډ وخت کې یې پلورل هم ستونزمن دی. هغه زیاتوي، د افغان کډوالو د شتمنیو، ملکیتونو او کاروبارونو د خوندیتوب لپاره یې له پاکستاني چارواکو غوښتنې کړې دي. د هغه په خبره، اړینه ده چې د پاکستان حکومت، د ملګرو ملتونو د کډوالو سازمان او د افغانستان حکومت په ګډه یوه درې اړخیزه کمېټه جوړه کړي، څو د افغان کډوالو د منظم لېږد چارې پرمخ یوسي.