د افغانستان د سرحدي امنیت په برخه کې په دې وروستیو میاشتو کې د پام وړ بدلونونه رامنځته شوي دي. د ملي دفاع وزارت ویلي، چې د هېواد د پولو د ساتنې لپاره امنیتي اقدامات ډیر شوي دي، چې موخه یې د ګواښونو مخنیوی او د سرحدي سیمو ثبات دی.
د وزارت د معلوماتو له مخې، په سرحدي سیمو کې د ځواکونو ځای پر ځای کول سره تنظیم شول او د چټک غبرګون قطعې د حساسو نقطو ترڅنګ فعالول هغه څه دي،د افغانستان ډیری سرحدونه ورسره خوندي شوي دي. وزارت دغه راز وایي، چې د سرحدونو د څار لپاره عصري تخنیکي سیستمونه کارول کیږي او دغه چارو د احتمالي امنیتي پېښو د مهارولو وړتیا لوړه کړې ده.
په دغو اقداماتو کې د بهرنیو شرکتونو او پانګوالو امنیت ځانګړی ځای لري. دفاع وزارت وایي، د چینایي شرکتونو او د هغوی د کارکوونکو د خوندیتوب لپاره ځانګړي امنیتي پلانونه جوړ کړل شوي او د سرحدي پروژو شاوخوا د ساتنې کچه لوړه کړل شوه. دغه راز، ورته تدابیر د ټولو بهرنیو پانګوالو لپاره هم عملي کړل شوي او پلي شوي دي.
له بلې خوا، د سرحدي ځواکونو ترمنځ همغږي هم پیاوړې کړل شوه. د وزارت په خبره، له ګاونډیو هېوادونو سره د معلوماتو شریکول زیات کړل شول، ګډې ناستې ترسره شوې او منظم تماسونه ټینګ کړل شول، چې دې کار د ناامنه کړیو د فعالیتونو مخه تر ډېره ونیوله.
په همدې حال کې، د سرحدي پولیسو د لوی ریاست ویاند، عابدالله فاروقي، وویل چې په سرحدي بندرونو کې د امنیتي چمتووالي ترڅنګ د مسافرو د خدمتونو کچه هم لوړه کړل شوې ده. د هغه په وینا، ځواکونه بشپړ چمتو ساتلی تر څو د تګ راتګ امنیت تامین شي.
دا په داسې حال کې ده چې څه موده وړاندې د افغانستان–تاجکستان پولې ته نږدې یوه خونړۍ پېښه رامنځته شوه چې پکې درې چینایي وګړي ووژل شول. د بهرنیو چارو وزارت وروسته وویل، دا پېښه د هغو کړیو کار و چې د هېوادونو ترمنځ د بېباورۍ رامنځته کول هدف دی.
