په دې وروستیو کې یو ځل بیا ملیکانو ته مرګ ژوبله او زیانونه زیات شوي دي. دواړه لوري په خپلو جګړو، عملیاتو، چاودنو او بمباریو کې ملکیانو ته مخامخ مرګ ژوبله اړوي. د وسله والو طالبانو له خوا په ځای پر ځای شوو بمونو کې بې ګناه ملګي وګړي، ښځې او ماشومان وژل کېږي. همدا په دوو ورځو کې په تخار او بغلان کې د دوی له خوا ځای پر ځای شوو بمونو تر شلو ډېرو ملکي وګړو ته مرګ ژوبله اړولې. په تخار کې د ښوونځي شپږ ماشومان پر یو ماین وختل او ووژل شول، په بغلان کې بیا پر یو بل ماین ملکي وګړي ور برابر شوي چې اته تنه وژل شوي او شپږ نور ټپیان دي. له همدې سره پر یو وخت په حکومتي عملیاتو کې هم پراخه مرګ ژوبله اوړي. په دې وروستیو کې په حکومتي عملیاتو کې په قصدي او شعوري ډول د ملکي وګړو لسګونه کورونه نړول شوي چې تصویرونه یې په ټولنیزو رسنیو کې هم خپاره شوي دي.
له بده مرغه ښکېل لوري د دې پر ځای چې د ملکي مرګ ژوبلې د مخنیوي لپاره عملي ګامونه واخلي، هڅه کوي چې دا وحشتونه او جنایتونه توجیه کړي. دواړه لوري لومړی ملکي مرګ ژوبله نه مني او چې کله یې ومني، بیا هم داسې ګام نه اخلي چې د تکرار مخه یې ونیول شي. له بده مرغه دوی د ملکي وګړو ژوند ته اهمیت نه ورکوي. ښکېل لوري باید پوه شي چې د ښځو، ماشومانو او نورو بې ګناه وګړو په وژلو سره د زور ښودل نه کوم اسلامي کار دی او نه هم کوم افغاني او انساني کار. د ښځو او ماشومانو وژل د کمزورو، ډارنو، بې اصولو او وحشي خلکو کار دی چې په هېڅ ډول نه توجیه کېږي. ځینې دا کار د تېروتنې یا بلې پلمې پر اساس توجیه کوي چې دا خپله جنایت او وحشت ته مشروعیت ورکول دي. په کلي او کور کې چې ښځې، ماشومان او نور بې ګناه وګړي پکې اوسیږي، بمباري او هوايي بریدونه تېروتنه نه ده، بلکې په قصدي ډول د ملکیانو وژنه ده. د یو یا څو طالبانو لپاره د ټول کور یا کلي بمبارول او نړول یوازې وحشت دی او بس. همداسې د خلکو د استوګنې او ګڼې ګوڼې په ډکه سیمه کې پر یوه نظامي یا بل هر هدف برید وحشت دی. په هر هدف برید دا وحشت نه شي توجیه کولی. دا خبره چې ګواکې خلک دې له دغو مرکزونو لرې وي، غیر عملي ده او یوازې وحشت ته توجیه پیدا کول دي. له بله اړخه په عامو لارو کې د بمونو اېښودل هم د ملیکانو ژوند ته د نه پاملرنې یوه ښکاره نښه ده چې په هېڅ ډول د زغم وړ نه ده.
د ملکي وګړو مرګ ژوبله زیاتیږي، خو له بده مرغه دواړه لوري د ملکیانو پر وړاندې ډېر بې توپیره چلند کوي او د ښځو، ماشومانو او نورو بې ګناه وګړو په وژلو سره غواړي خپلو سیاسي موخو ته ورسیږي. ښکېل لوري چې د ملکي وګړو د خوندیتوب کومې چیغې وهي، واقعیت دا دی چې دا تش شعارونه دي او دوی ته د ملکي وګړو ژوند هېڅ ارزښت نه لري.
