زعفران د دې تر څنګ چې د نړۍ تر ټولو قېمتي ګل دی؛ ډېرې روغتیايي ګټې هم لري. دلته د زعفرانو د ځينو روغتیايي ګټو په اړه خبرې کوو. د زعفرانو په اړه روغتیايي څېړنې وايي، زعفران د اعصابو لپاره فوق العاده ګټور دي. له څښلو سره یې ذهن سکون پیدا کوي. ځینې کسان په ناڅرګندو دلایلو ناارامه او خفه وي، یا د شپې خوب نه ورځي، یا ځینې کسان د ډېر کار له امله د ستړیا احساس کوي چې د ډاکټرانو په خبره، د زعفرانو څښل د دوی لپاره ښه درمل دي؛ ځکه زعفران په طبیعي ډول انسان خوشاله ساتي. د ذهن او اعصابو تر څنګ زعفران هضمي سیسټم ته هم خورا ګټور دي. روغتیا پالان باور لري چې زعفران معده ارامه ساتي او که په پرله پسې توګه د چایو په څېر وڅښل شي، نو د وینې کلسټرول له منځه وړلای شي. په هرات کې د زعفرانو چای نوم لري. همدارنګه په هرات او ځینو نورو ولایتونو کې له قابلي پلو او ځینو نورو خوړو سره هم زعفران ګډېږي چې هم د خوړو رنګ او خوند برابروي او هم اشتها زیاتوي.
