د کرونا له وېرې او اندېښنو سره د سولې پروسه یو ډول له پامه لوېدلې ده. ټاکل شوې وه چې اته ورځې وړاندې بین الافغاني خبرې پیل شي، خو نه یوازې چې خبرې پیل نه شوې، بلکې د حکومت له اړخه آن مرکچي پلاوی هم نه دی ټاکل شوی. که څه هم محمد اشرف غني د لوړې مراسمو په ورځ ژمنه وکړه چې د مارچ په لسمه به پلاوی اعلان کړي، خو دا دي نهه ورځې وروسته هم پلاوی نه دی اعلان شوی. له بله اړخه د بندیانو د تبادلې په برخه کې هم د حکومت ژمنې او د ولسمشر فرمان نه دی عملي شوی او دا چاره هم د دې سبب شوې چې د بین الافغاني خبرو د پیل پر وړاندې خنډونه ډېر شي.
کرونا جدي ګواښ دی، خو زموږ لپاره جګړه تر کرونا په زرګونو ځله خطرناکه ده. په ټوله نړۍ کې کورنا دومره کسان نه دي وژلي، لکه موږ چې هر کال په جګړه کې وژل کېږو. په ټوله نړۍ کې پر کرونا دومره کسان اخته شوي، لکه له ۲۰۰۱ ز کال څخه تر اوسه چې څومره افغانان په جګړه کې وژل شوي دي. له همدې امله کرونا باید جدي وګڼل شي، تدابیر ونیول شي او پر ضد یې مبارزه وشي، خو موږ باید د جګړې خاتمه او سوله هېر نه کړو. کرونا به ختمه شي، خو موږ به د جګړې کرونا همداسې وژني. له بده مرغه اوس داسې ښکاري چې د سولې لپاره هڅې او د سولې غوښتنې د کرونا د وېرې او اندېښنو تر سیوري لاندې راغلي دي.
حکومت پرله پسې په دې چاره کې ناغیړي کوي او خنډونه جوړوي. آن تر اوسه پورې یې پلاوی نه دی اعلان کړی. که څه هم حکومت وايي چې په دې اړه یې له سیاسي ګوندونو او سیاستوالو سره مشورې کړې دي او اعلان به یې کړي، خو له بیا بیا ژمنو سره سره نه یوازې پلاوی اعلان نه شو، بلکې سیاسي ګوندونه او سیاستوال وايي چې حکومت ورسره په دې تړاو هېڅ ډول مشورې نه دي کړې. له دې ښکاري چې حکومت لا هم خلکو ته دروغ وايي او غواړي چې د پلاوي ټاکل او اعلانول وځنډوي. دا ډول دروغ او د پلاوي نه ټاکل یوازې له سولې سره مخالفت او د جګړې دوام ته د لارې پرانیستلو په مانا دي. که نه، دا څنګه شونې ده چې حکومت دې په یوه کال کې یوازې یو پلاوی ونه شي ټاکلی چې ۱۵ غړي ولري؟! کله چې حکومت بیا بیا وايي چې طالبان دې له موږ سره خبرو ته حاضر شي، خو دوی د خبرو لپاره پلاوی ونه لري، نو په واقعیت کې دوی خبرو ته هېڅ ډول تیاری نه لري او دا غوښتنې یې هم یوازې د خلکو په سترګو کې د خاورې شیندلو لپاره دي.
اوس پکار ده چې سوله غوښتونکي سیاستوال او سیاسي ګوندنونه په دې برخه کې جدي غبرګون وښيي. دوی باید له ولس سره په ګډه د سولې پروسه او بین الافغاني خبرې جدي وګڼي. که حکومت پلاوی نه ټاکي، د ولسي استازو او د سیاسي ګوندونو د استازو په ګډون دې یو پلاوی له طالبانو سره خبرې پیل کړي او له حکومت سره دې واضح او پرېکنده چلند وکړي، څو موږ د جګړې له کرونا خلاص شو او سولې ته ورسیږو.
