د قطر په پلازمېنه دوحه کې د امریکا او طالبانو ترمنځ د سولې تړون له لاسلیک وروسته او د تړون د یوې برخې په توګه، ټاکل شوې وه چې په لنډ وخت کې باید د بین الافغاني خبرو د پیل او باور فضا د رامنځته کولو په تړاو افغان حکومت پنځه زره طالب زندانیان او په بدل کې به یې طالبان زر حکومتي بندیان ازادوي. که څه هم له مهالوېش او ټاکل شوې مودې سره سم دا چاره ترسره نه شوه او دواړو لورو په یوځل یاد شمېر زندانیان ازاد نه کړل، خو له دواړو لورو څخه وخت ناوخته د محدود شمېر زندانیانو د ازادولو لړۍ روانه ده. دغه پروسه وروسته له هغې چټکه شوه، چې طالبانو په کوچني اختر کې درې ورځنی اوربند اعلان کړ او په مقابل کې یې ولسمشر غني هم د ورته اقدام اعلان وکړ.
دغه راز ولسمشر غني وویل چې د سولې پروسې د بریاليتوب او ښه نیت په پار به په لنډه موده کې دوه زره نور طالب زندانیان هم خوشي، طالبانو د حکومت د دغه اقدام هرکلی وکړ او له خپل لوري څخه یې هم د زندانیانو د ازادولو ژمنه وکړه. افغان حکومت له یاد شمېر نیمايي زندانیان د اختر په ورځو کې خوشي کړل او تازه د ملي امنیت شورا ویاند جاوید فیصل ویلي چې حکومت په تېرو دوو ورځو کې پر بګرام او پلچرخي زندانونو سربېره، د ولایتونو له زندانونو ۷۱۰ طالبان ازاد کړي او دا لړۍ به نن هم دوام وکړي، ترڅو د ولسمشر غني له فرمان سره سم یې شمېر زر تنو ورسېږي. په ورته وخت کې په قطر کې د طالبانو د سیاسي دفتر ویاند سهیل شاهین هم تېره ورځ پر خپل ټويټر کې ویلي، چې په بېلابېلو ولایتونو کې یې ۷۳ حکومتي سرتېري له خپلو زندانونو ازاد کړي دي.
په ټوله کې د سولې پروسې د بریالیتوب او د بین الافغاني خبرو د پیل لپاره وروستي ګامونه پرځای او مثبت دي، خو بسنه نه کوي. دواړې خواوې باید په خپل اوسني دریځ کې نور هم نرمښت راولي او ټول هغه خنډونه له منځه یوسي چې تر دې دمه یې د بین الافغاني خبرو د پیل مخه ډپ کړې ده. په لومړي قدم کې حکومت او طالبان باید د ښه نیت او باور فضا د رامنځته کولو لپاره هغه ټول زندانیان ازاد کړي چې د دوحې د سولې په تړون کې پرې هوکړه شوې وه. دویم او مهم اقدام د اوربند مسئله ده، دواړه لوري باید ژر تر ژره روان تاوتریخوالي ته د پای ټکی کېږدي او پر یوه سرتاسري اوربند هوکړه وکړي. درېیمه خبره هم د بین الافغاني خبرو د پیل نېټه او ځای دی چې ژر تر ژره یې دې چارې بشپړې شي او د دواړو لورو پلاوي دې په خپلو کې سره کېني.
په پای کې اړینه ده چې بیا هم د بین الافغاني خبرو د پیل او د سولې پروسې د بریالي کېدو لپاره دواړه اړخونه کوټلي ګامونه اوچت کړي، په اوسنیو دریځونو کې دې لا ډېر نرمښت راولي، په دواړو خواوو کې دې مغرضو کړیو ته د دې فرصت نه ورکول کېږي چې دا پروسه سبوتاژ کړي او په یوه او بله بهانه پکې خنډونه رامنځته کړي. ټوله هڅه دې د بین الافغاني خبرو پر پیل، بریالي کېدو او د افغانستان د راتلونکي حکومت پر جوړښت وشي، داسې حکومت چې ټول اړخونه پکې ځان خوندي وویني او پر دې سره دې به روانې کشالې ته د پای ټکی کېښودل شي او د هېواد د راتلونکي د ابادۍ لپاره به لاره پرانیستل شي.
