د امریکا د ولسمشر د ملي امنیت پخواني سلاکار جان بولټن په خپل تازه لانجمن کتاب کې د افغانستان په اړه د ټرمپ د ذهنیت یو روښانه تصویر وړاندې کړی دی. په کتاب کې راغلي چې ټرمپ ویلي، په افغانستان کې د امریکايي ځواکونو حضور وحشت دی چې پړه یې پر جورج بوش ده. نوموړي ويلي چې امریکا په افغانستان کې پوره ماتې خوړلې ده او باید له دې هېواده څخه ژر امریکايي ځواکونه و ایستل شي. ټرمپ ویلي چې د افغانستان په جګړه کې میلیونونه خلک وژل شوي، ټریلیونونه ډالر لګول شوي، خو دا جګړه نه ده ګټل شوې او که وګټل شي، بیا هم امریکا څه نه تر لاسه کوي. په کتاب کې دغه راز ویل شوي چې ټرمپ په افغانستان کې د داعش د فعالیتونو په اړه ویلي چې پرېږدئ روسیه دا ستونزه حل کړي.
د ټرمپ له خبرو په واضح ډول ښکاري چې هغه غواړي د افغانستان له ستونزې ځان خلاص کړي. که څه هم پنټاګون او نور بنسټونه منظمه هڅه کوي چې د ټرمپ د تصمیم پر وړاندې خنډونه جوړ کړي، خو داسې ښکاري چې د افغان جګړې په تړاو د امریکا عامه ذهینت له ټرمپ سره مرسته کوي چې دا جګړه ختمه کړي او امریکايي ځواکونه له افغانستان څخه وباسي. وروستي بدلونونه هم همداسې دي چې امریکايي ځواکونه به افغانستان پرېږدي او آن د دې شونتیا هم شته چې امریکا یو مخ افغانستان پرېږدي او لکه چې ټرمپ وايي، سیمه ییز هېوادونه په افغانستان کې ښکېل کړي او هر څه دوی ته ور پرېږدي. د سیمې هېوادونه به د امریکا په نیابت لوبه مخ ته بیايي او په دې سره به هم امریکا د افغان جګړې له مسوولیت څخه خلاصه وي او هم به یې ځواکونه خوندي وي او پیسې به یې هم نه لګېږي. له همدې امله په افغانستان کې د یو اساسي بدلون شونتیا ډېره ده.
اوس چې امریکا ځي او باید ولاړه شي، موږ له خپل هېواد او خپلو خلکو سره څه کوو؟
له بده مرغه لا هم ځیني کسان د امریکا پاتې کېدو ته هیلهمن دي او هڅه کوي چې د سولې په تخریب سره د امریکا پاتې کېدو ته لاره هواره کړي. دوی باید درک کړي چې امریکايي ځواکونه وځي او د دوی خنډونه او هلې ځلې د امریکا پرېکړه نه شي بدلولی، نو باید نوره دا هڅه پرېږدي. امریکا به وځي، خو پکار ده چې موږ د بین الافغاني خبرو د پیل او بیا جوړجاړي لپاره ټول شته خنډونه له منځه یوسو او ژر په دې برخه کې پرمختګ وکړو. که موږ سولې ته ونه رسیږي او حالت همداسې دوام وکړي، نو افغانستان تر دې ناوړه حالت ته تللی شي. له همدې امله پکار ده چې ټول اړخونه د سولې لپاره هلې ځلې وکړي. حکومت باید نور د سولې پر وړاندې خنډونه جوړ نه کړي او د سولې پر وړاندې جوړې کړې سرې کرښې یې ور ټولې کړي. طالبان هم باید انعطاف وښيي. د ټرمپ دا ادعا چې امریکا ماتې خوړلې، باید دوی داسې مغروره نه کړي چې ستونزې جوړې کړي. پکار ده چې د افغانستان پر ژغورنې فکر او کار وشي او دا چانس ضایع نه شي.
