ولسمشر مخکې د یوه فرمان له لارې د ډاکټر عبدالله عبدالله د ډلې لس وزیران لسو وزارتونو ته د سرپرست په توګه معرفي کړي وو. خو د ځینو اختلافونو له امله تر ځنډ وروسته ایله پرون دغه وزیران وزارتونو ته ورمعرفي شول. په دې ډله کې داسې څېرې شته چې مخکې یې هم پر لوړو حکومتي څوکیو دندې ترسره کړې دي او ځینې یې بیا نوې څېرې دي چې د ډاکټر عبدالله عبدالله او ولسمشر غني ترمنځ د معاملې پر اساس پر دندو ګومارل شوې دي.
په دې کې شک نشته دی چې د حکومت پر اوسنۍ کابینه پراخ انتقادونه موجود دي. همدا چې د ډاکټر عبدالله عبدالله د ډلې لس وزیران د ولسمشر غني له لوري سرپرست وزیران اعلان شول په ټولنیزو رسنیو کې یې پراخ غبرګونونه وپارول. ځینو دا معامله ناکامه وبلله او د ځینو څېرو راتګ یې پر حکومتولۍ ملنډې وهل وبلل. خو اوس دا چې هر څه د یوې معاملې له مخې روان دي تر څنګ یې ځینې موارد هم شته چې د افغانستان د ملي ګټو لپاره مهم دي. دا هغه موارد دي چې باید عملي شي او په دې حساسو شرایو کې د افغانستان د ژغورنې اصل دی.
د سولې خبرې روانې دي، دا هم معلومه ده چې حکومت ته اړتیا ده، دلته باید حکومتولي وي، قانون وي او مسایل له قانوني مراجعو حل شي. تر هر څه مهمه دا ده چې اوس دې ولسمشر سرپرسته کابینه پارلمان ته ور معرفي کړي او وزیران دې د باور رایه خپله کړي. پر وزارت سرپرست پاتې کېدل پخپله بې کفایتۍ او فساد ته د لارې هوارولو په مانا ده. وزیران باید له سرپرستۍ ووځي او کابینه دې له نیوکو خلاصه شي.
بله مهمه خبر کار دی. اوس وزیران د وېش پر اساس راغلي دي او دا معلومه خبره ده چې دوی به تر ملت او پارلمان ډېر هغو کسانو ته ځواب ویونکي وي چې دوی یې په برخه کې راغلي او پر وزارت ګومارل شوي دي. خو له دې سره سره افغانستان کار ته اړتیا لری. هېواد په یوه کړکېچن وضعیت کې دی. د سولې خبرې روانې دي او هر لوری د امتیاز اخیستو هڅه کوي. اوس که حکمت کارا وي، وزیران د کار خلک وي، خپل مسوولیتونه په سمه توګه ادا کړی شي، نو واضح خبره ده چې خلک به له حکومت راضي وي او حکومت به په مذاکراتو کې ډېر امتیاز واخلي.
خو که برعکس حکومتي وزیران یوازې د خپلې ډلې مشر ته ځواب وواي او ځان د سهمیې په اساس راغلی د هر څه مالک وبولي، د ولس درد دوا نه کړي، د هېواد حساس شرایط درک نه کړي او پر ځای پرېکړې و نه لري، نو دا به هم د مذاکراتو پر مېز د افغان حکومت موقف کمزوری کړي او هم به د افغانستان وضعیت تر دې بد کړي.
ولس له جګړو ستړی دی، له فساد ستړی دی، د حکومت د امتحان وخت همدا دی، چې دوی څنګه د ولس زړه ګټي. دوی همدلته کولی شي ولس یا د ځان په طرف کړي او یا یې له ځان زړه توری کړي. اوس حکومت ته په کار ده چې د خپل انتخاب مطابق خپل کوښښونه هم ډېر کړي.
