په دوحه کې د بین الافغاني خبرو د پیل لپاره د دواړو اړخونو تر منځ پر اصولو او کړنلاره لا هم بحثونه روان دي. دواړه اړخونه په دې برخه کې د پرمختګ خبر ورکوي او تمه ده چې ژر به پر دې چاره توافق وشي او بیا به پر اجنډا هم توافق کېږي، چې ورسره به بین الافغاني خبرې پیل شي. له دې سره هممهاله منظمې او پرله پسې هڅې کېږي چې رامنځ ته شوی فرصت ضایع شي، فضا جګړهییزه شي او د سولې په تړاو بیا ناهیلي خپره شي.
د سولې له بین الافغاني خبرو سره جګړه ګرمه شوې ده چې په طبیعي ډول دا چاره د سولې مخالف عمل دی، چې پر خبرو منفي اغېز کوي. دا سمه ده چې تر اوسه پورې سوله نه ده شوې او نه هم پر اوربند توافق شوی دی، خو د خبرو له پیل سره که جګړه کمېږي نه، نو په هېڅ ډول باید زیاته نه شي. آن د حسن نیت لپاره باید جګړه نوره هم کمه شي، خو ښکاري چې جګړهخوښي عناصر له دې موقع استفاده کوي او غواړي جګړه زیاته کړي، څو د سولې پر پروسه منفي اغېز وکړي. د دې تر څنګ لا هم ځینې چارواکي جګړهییز ادبیات کاروي، نفرت خپروي او داسې ښيي چې ګواکې سوله ناشونې ده او یا یې هم څرګندونې سولهییزه فضا خرابوي. د ولسمشر د مرستیالانو او آن خپله د ولسمشر خبرې همداسې یوه هڅه ده چې د سولې پروسه خرابولی شي. په داسې حالاتو کې چې د سولې خبرې روانې دي، دغه ډول ادبیات کارول په هېڅ ډول د سولې په ګټه نه دي، بلکې دا ډول خبرې د جګړې او نفاق سبب کېږي. که څه هم ښکاري چې دا څرګندونې په قصدي او شعوري ډول د سولې د تخریب لپاره کېږي، خو که چارواکي یې قصدي هم نه ګڼي، بیا هم د توجیه وړ نه دي. دا هغه وخت دی چې باید سولهییزه ژبه وکارول شي، له منفي خبرو ډډه وشي او که مثبتې خبرې نشي کېدلی، نو بیا تر منفي خبرو چوپتیا هم غوره ده. طالبان څنګه دي، امارت څنګه دی، جمهوریت څنګه دی…؟ په دې اړه خلک پوهیږي، خپل قضاوت لري او هر څه ویني. په دې اړه د چارواکو خبرې د خلکو نظر نه شي بدلولی، بلکې یوازې فضا خرابولی شي. پر لانجمنو مسایلو بحث، تورونه، د یو بل پر ضد په ټولنیزو رسنیو کې تبلیغات او نورې دا ډول کړنې د سولې د روان بهیر پر زیان دي او پکار ده چې ونه شي.
دواړو اړخونو ته پکار ده چې ولس ته درناوی وکړي، پر ولس رحم وکړي او پرېږدي چې د دې مظلومو خلکو د وینو دا سیلاب بند شي. که دوی رښتیا د خلکو او د دوی د ارزښتونو لپاره مبارزه کوي، نو پکار ده چې د خلکو اصلي غوښتنې ته چې سوله ده، کار وکړي. آن د نظام د ډول په شان په اختلافي مسایلو کې د پرېکړې واک د ټولپوښتنې له لارې ولس ته ورکړي. ولس پوهیږي چې بیا جمهوریت ټاکي، که امارت او یا هم کوم بل نظام. له همدې امله دوی باید خلکو ته د نظام ټاکلو پر ځای، خلکو ته حق ورکړي چې خپله نظام وټاکي. دوی باید همدومره وکړي چې د سولې روانه پروسه تخریب نه کړي او پرېږدي چې بریالۍ شي.
