محمد اشرف غني وړمه ورځ پکتیکا ته سفر کړی و او هلته یې د نورو تشریفاتي خبرو او ژمنو تر څنګ دا هم ویلي چې ګواکې نوموړي ټول افغانستان جوړ کړی، خو د کلیو د پراختیا وزیر ته یې له دې امله پېغور ورکړی چې لویې پکتیا ته پام نه کوي. نوموړي په تکرار مخاطبینو ته ویلي: «ما ټول افغانستان جوړ کړ او که نه!؟»
د اشرف غني دغو خبرو ته پرون په ټولنیزو رسنیو کې پراخ غبرګون ښودل شوی دی. څوک پرې ملنډې وهي، ظنزیه ویډیوګانې پرې جوړوي او څوک یې هم د خلکو په سترګو کې پر خاورې شیندلو، پرله پسې او له حده په ډېرو دروغ ویلو او آن مخاطبینو ته په سپکاوي تورنوي. دا لومړی ځل نه دی چې نوموړی دغه ډول لویې او آن خندوونکې ادعاوې کوي، بلکې تر دې وړاندې یې هم بیا بیا دغه ډول څرګندونې کړې وې چې د خلکو د مسخرو او نیوکو لامل شوې وې. اوس اساسي پوښتنه دا ده چې اشرف غني د معلوماتو په خلا کې دی او له واقعیتونو خبر نه دی، که په قصدي او شعوروي ډول دا ډول خبرې کوي؟
که ستونزه دا وي چې ولسمشر له واقعیتونو دومره ناخبره وي، نو بیا خو دا د بې کفایتۍ او کمزورۍ وروستی حد دی چې په هېڅ ډول د توجیه وړ نه دی. که خبره دا وي چې ولسمشر پوهیږي او هر څه درک کوي، خو بیا بیا د خلکو په سترګو کې خاورې شیندي، لویې اعاوې کوي، دروغ وايي او هڅه کوي چې خلک تېر باسي، نو دا په واقعیت کې د افغانستان ستر ولس ته سپکاوي دی، ځکه چې خلک دومره ړانده او بې خبره نه دي چې د اشرف غني په دې خبرو تېروځي، خو نوموړی ورته همداسې فکر کوي. خلک سترګې لري، عقل لري او ویني چې د اشرف غني په واکمنۍ کې څنګه افغانستان د تخریب او زوال لوري ته روان دی. سړی حیران شي چې اشرف غني کوم داسې کار کړی، چې بیا ادعا کوي، ټول افغانستان یې جوړ کړی دی. واقعیت دا دی چې د اشرف غني په وخت کې نه یوازې د حساب وړ رغونه نه ده شوې، بلکې تخریب شوی او آن جوړې شوې ادارې په منظم او مسلسل ډول تخریب شوي دي. اشرف غني د افرادو لپاره ادارې جوړې کړې دي، د افرادو لپاره یې ادارې ړنګې کړې دي، ادارې یې وېشلي دي او ګډې کړې یې دي. حکومتولي یې مسخره کړې او قانون یې په یوه بې ارزښته څیز بدل کړی دی.
د اشرف غني مشاورین دې هغه پوه کړي چې دا ډول خبرې نه یوازې د ولس نظر او فکر نه شي بدلولی، بلکې خپله اشرف غني په دروغجن، مسخره او بې ارزښته واکمن بدلېږي. اوس یې هم پوره خبرې او دریځ بې ارزښته شوي دي او ډېر خلک یې خبرې د دې لپاره اوري چې پرې وخاندي او مسخره یې کړي. له بده مرغه اشرف غني اوس د افغانستان ولسمشر یادېږي او د یوه دولت مشري کوي، خو په دې خبرو ورسره افغانستان او دولت دواړه مسخره او بې ارزښته کېږي. له همدې امله پکار ده چې نور دا ډول هوا ګز نه کړي، بلکې مقعولې او سمې خبرې وکړي او نور ځان، حکومت او افغانستان مسخره نه کړي.
