ټاکل شوې چې د نومبر په درېیمه په امریکا کې د ولسمشرۍ ټاکنې وشي او ډېری افغانان فکر کوي چې د افغانستان د سولې او جګړې راتلونکی د دې ټاکنو له پایلو سره تړلی دی. که ټاکنې اوسنی ولسمشر ټرمپ وګټي، نو د دې ډېره شونتیا ده چې له طالبانو سره یې کړې هوکړه پوره عملي شي، بهرني ځواکونه ووځي او په کور دننه هم د جوړجاړي شونتیا شته؛ خو که ټاکنې جوبایډن وګټي، نو له طالبانو سره د شوې هوکړې په اړه د امریکا له اړخه د بیا کتنې شونتیا شته. که څه هم بایډن داسې څه نه دي ویلي، خو هغوی چې د امریکا او طالبانو د هوکړې مخالف دي، له بایډن همدا تمه لري.
د افغانستان په تړاو د ډونالډ ټرمپ او بایډن تګلارې سره ورته ښکاري، یوازې په دومره توپیر چې بایډن وايي له داعش سره به د جګړې لپاره یوه برخه امریکايي ځواکونه په افغانستان کې پرېږدي. که څه هم تر نوماندۍ وړاندې بایډن ویلي وو چې افغانستان باید پاکستان ته وسپارو او له هغه ځایه خپل ځواکونه را وباسو. اوس چې د امریکا ټاکنو ته د ګوتو په شمېر ورځې پاتې دي، د امریکا او طالبانو د هوکړې پلویان تمه لري چې ټرمپ ټاکنې وګټي او په دې سره به دا هوکړه پوره عملي شي. له همدې امله په زړه کې دا هیله لري چې ټاکڼې ټرمپ وګټي؛ خو د افغانستان د حکومتي چارواکو په ګډون، د طالبانو او امریکا د هوکړې مخالفین بیا تمه لري چې ټاکنې بایډن وګټي او آن داسې ویل کېدل چې د افغانستان حکومت په همدې تمه تر اوسه پورې د سولې په لاره کې خنډونه جوړول، د بندیانو خوشې کول یې ځنډول او ټوله هڅه یې دا وه چې د امریکا تر ټاکنو پورې لوی پرمختګونه وځنډوي. سره له دې چې بایډن د افغانستان په تړاو ډېر څه نه دي ویلي او داسې دریځ یې هم نه دی خپل کړی چې په افغانستان کې یې د هغه پلویان یا غوښتونکي تمه لري، خو بیا هم یوه برخه کسان فکر کوي چې ښايي هغه له ټرمپ څخه متفاوته تګلاره ولري او له طالبانو سره شوې هوکړه لغوه کړي او یا هم له سره ورته کتنه وکړي.
د افغانستان په تړاو که د امریکا تګلارې ته ژوره کتنه وشي، داسې نه ښکاري چې هلته به د ولسمشرانو په بدلون پکې اساسي تغیر راشي. ښايي څه واړه بدلونونه راشي، خو له افغانستان څخه به ټول یا لویه برخه امریکايي ځواکونه وځي او امریکا به دلته د یو پیاوړي ملګري په لټه کې وي چې ګټې یې خوندي کړلی شي. له همدې امله د امریکا ټاکنې به د افغانستان پر سوله او جګړه کوم اساسي اغېز ونه لري.
څه چې د افسوس وړ دي او ډېره دردوونکې ده، هغه دا چې زموږ برخلیک یو مخ زموږ له لاسه وتلی دی او دلته واکمنان او لوبغاړي هر څه په امریکا کې د ولسمشر په بدلون پورې تړلي ګڼي. دا د یوه ملت او هېواد لپاره ډېره دردوونکې ده. زموږ سیاسیون او د جګړې دواړه اړخه باید له دې امله د شرم او خجالت احساس وکړي چې مسایل په امریکايي ټاکنو پورې تړلي ګڼي. دا واقعاً دردوونکې ده او موږ به تر هغو له دې ذلت څخه خلاص نه شو، څو چې خپلې ستونزې خپله سره حل نه کړو او د پردیو له سیوري ځان خلاص نه کړو.
