د جنایتونو او جرمونو د وروستیو پېښو د غندنې تر څنګ، ارګ یو ځل بیا د څېړنو ژمنه کړې ده. پرون په کابل د افغانستان بانک سلاکار یما سیاوش او د هغه دوه همکاران په یوه چاودنه کې ووژل شول. ارګ وايي دا پېښه به څېړي. تر دې وړاندې هم پر کابل پوهنتون او کوثر ښوونیز مرکز له برید وروسته، ارګ په دې اړه د څېړنو خبره کړې وه؛ خو ایا د څېړنو دا ژمنې پایله لري؟
وژنو او وحشتونو ته د ارګ او خلکو ظاهري غبرګون سره ورته دی، دواړه پېښې غندي؛ خو ارګ کله بیا پکې ور زیات کړي چې په دې اړه به پلټنې او څېړنې کوي. ارګ د سلګونو پېښو د څېړنو ژمنې کړې دي، خو د یوې پېښې پایلې هم له ولس سره شریکې شوې نه دي. ښايي په ځینو پېښو کې څېړنې شوې وي، خو هغه به هم نیمګړې او یا هم بې پایلې وي. د ځینو پېښو د څېړنې په نامه هسې نمایشي کارونه شوي او کله چې پېښه د خلکو له یاده وتلې، نو بیا پایلې هم پسې ورکې شوې دي. اوس چې ارګ بیا د څېړنو خبره کوي، لومړی خو غواړي ووايي چې دوی یو څه کوي او لاس تر زنې نه دي او بل دا چې غواړي په دې ډول ژمنو سره د خلکو احساسات کنټرول کړي.
د حکومت دنده د خلکو د مال او سر ساتنه ده، دنده یې غندل نه دي، نو ځکه مخامخ پړ دی. ارګ د پېښو په غندنو او یا د څېړنو په ژمنو سره ځان له مسوولیت څخه نه شي خلاصولی. دوی په خپله اساسي دنده کې ناکام دي؛ ورځ تر بلې وحشت زیاتیږي، جومات، ښوونځی، مدرسه، پوهنتون، روغتون او بل هېڅ ځای امن نه دی او د دې چارې مسوول بې کفایته ولسمشر او د ده د حکومت مفسد او کمزوري چارواکي دي. دا سمه ده چې دښمن وحشي دی، هېڅ ډول پولې نه پېژني، خو د حکومت دنده څه ده، ولې نه شي کولی چې د دغه ډول سترو پېښو مخه ونیسي او تر کله به موږ همداسې وېر کوو او د یو بل جنازې ته به اوږه ورکوو!؟
ارګ له مسوولیت څخه د تېښتې لپاره یا غندنه کوي، یا دښمن بد ګڼي او یا هم د څېړنو خبره کوي؛ خو دا ټولې خبرې یې نه د وینو او وژنو دا لړۍ دروي او نه هم کوم بدلون راولي. دا ډول بریدونه او پېښې که د وحشي دښمن څېره انځوروي، خو یو څوک خو باید ځواب ووايي چې څنګه دا ډول پېښې کېږي؛ یو څوک خو باید ځواب ووايي چې پر کوثر ښوونیز مرکز برید څنګه وشو او یو څوک باید ووايي چې د کابل پوهنتون د برید له امله کوم امنیتي چارواکی پړه دي، څوک ناکام دي او د چا فساد او ناکامۍ دښمن ته لاره پرانیسته چې دا ډول وحشت وکړي!؟
خلک نور د ارګ له بې ځایه غندنو، سیاسي لوبو، بې مانا او بې ارزښته څېړنو ستړي شوي دي. د وحشتونو د دې څپې مخه باید ونیول شي او په ارګ کې چارواکي دې د خلکو په سترګو کې د خاورې شیندلو پر ځای داسې عملي ګامونه واخلي، چې د دغو وحشیانه بریدونو مخه ونیول شي.
