په دې وروستیو کې په افغانستان کې د اسټراليايي ځواکونو له خوا د شویو جنایتونو په اړه بحثونه ګرم شوي دي. اسټراليايي ځواکونو په اروزګان کې د خپل ماموریت پر مهال ګڼ بې ګناه خلک چې پکې ښځې، ماشومان او سپین ږیري هم شامل دي، ځورولي، شکنجه کړي، بنديان کړي او وژلي دي. د اسټراليايي ځواکونو د جنایتونو رسواینې آن څو اسټراليايي پوځیان ځان وژنې ته اړ کړل او په نړیواله کچه یې غوغا جوړه کړه. اوس د دغو جنایتونو د یوه تصویر خپرولو د چین او اسټرالیا ترمنځ لفظي شخړه راپورته کړې او پرون بیا یوې بلې نړیوالې رسنۍ هم د دغو جنایتونو نوي تصویرونه خپاره کړي وو.
د اسټرالیايي ځواکونو افشا شوي جنایتونه رښتیا هم زړه بوږنوونکي دي. دا یوازې افشا شوي جنایتونه دي، خو ښايي ډېر به لا همداسې پټ پاتې وي. د اروزګان کلی کلی او کور کور د اسټراليايي وحشي پوځیانو د جنایتونو شاهد دی. دوی هلته هر ډول جنایت کړی، دوی د خپلې ساتېرۍ او مسخرو لپاره خلک وژلي دي. د خلکو ځورول، وهل، وژل او جنایت د دوی لپاره د خوند او لوبو یوه لاره وه. دوی داسې کارونه کړي چې که ټول پسې مستند شوي وای، نو ښايي د نړۍ د جنګي جرمونو او جنایتونو په تاریخ کې به دا یو ډېر لوی څپرکی وای.
دا یوازې اسټراليايي ځواکونه نه دي، بلکې افغانستان ته ټولو راغلو بهرنیو ځواکونو همداسې جنایتونه او وحشتونه کړي دي. امریکايي، برېټانوي، جرمني او نورو بهرنیو ځواکونو په افغانستان کې د جنایتونو ریکارډ ټینګ کړی دی. دوی ممنوعه وسلې کارولي، انسانان یې سوځولي، پوره کلي یې ړنګ کړي او خلک یې وژلي دي، انسانان یې پر سپیو داړلي، په څاګانو کې یې اچولي، تر ټانګونو لاندې یې کړي، دیوالونه یې پرې ور نړولي، په کېمیاوي او بیولوژیکي وسلو یې افغانان وژلي او سوځولي او د روحي شکنجې لپاره یې په مسلسل ډول د هغوی دیني ارزښتونو او مقدساتو ته توهین کړی دی. د دوی د دغو جنایتونو په اړه اسناد او شواهد هم شته، البته دا اسناد او شواهد د ځینو پېښو دي او د ډېری پېښو اسناد او شواهد لا هماغسې پټ پاتې دي.
په افغانستان کې د بهرنیو ځواکونو جنایتونو د نړیوالو وجدانونه ولړزول، خو په افغانستان کې ځینې وجدانونه لا هم ارامه دي. دلته ځینو چارواکو او سیاستوالو دا هر څه نه یوازې اورېدلي، بلکې ځینې یې لیدلي او په ځینو کې دوی شریک هم دي. د بهرنیو ځواکونو دغو جنایتونو ته د دوی غبرګون ډېر سوړ دی او آن دا ورته مهمه نه ده. دوی په راتلونکي کې هم د دغو جنایتونو د مخنیوي غږ نه کوي او آن په یو ډول یې د دوام لپاره هلې ځلي کوي. دوی د بهرنیو ځواکونو د وتلو مخالفت کوي او غواړي چې دا وحشي ځواکونه همدلته پاتې شي، جګړه وکړي او همداسې جنایتونه او وحشتونه وکړي. له همدې امله د سولې مخالفت کوي او لا هم د جګړې، وینو او وژنو خبرې کوي. دا کسان له خپل ولس سره په دښمنۍ کې له ټولو پولو اوښتي او د وحشي، جنایتکاره او مجرمو بهرنیو ځواکونو ملګري، د جرم شریکان او ملاتړي دي. دوی او بهرني ځواکونه دواړه، په یو ډول مسوول دي او باید حساب او کتاب ورسره وشي.
