د کډوالو نړیوال سازمان: روان کال تر ۶نیم لکه ډېر افغان کډوال خپل هېواد ته ستانه شوي

د کډوالو نړیوال سازمان وایي چې روان کال د جنوري میاشتې راهیسي تر اوسه پورې تر شپږ نیم لکه ډېر افغان کډوال خپل هېواد ته ستانه شوي دي. د یاد سازمان په خبره، سږکال له ایران او پاکستان څخه ۶ لکه او ۵۸ زره او ۹۷۵ افغان کډوال خپل هېواد ته راغلي دي. دغه سازمان وایي، له دې ډلې ۶۵۲۰۶۰ افغانان له ایران او ۶۹۱۵ له پاکستان څخه خپل هېواد ته تللي دي. بلخوا د ملګرو ملتونو د کډوالو عالي کمیسارۍ د اټکل له مخې سږکال د جګړو له امله په کور دننه هم ۲۷۰ زره افغانان د خپلو مېنو پرېښودو ته اړ شوي دي او اوسمهال په تر ټولو بد بشري وضعیت کې ژوند کوي. دا کډوال پر داسې مهال راستنېږي چې په دې وروستیو کې په ټول هېواد کې جګړو او تاوتریخوالي هم زور اخیستی دی.