د چین د انسان وړونکې فضايي چارو دفتر خبر ورکړ، چې د LM-5B-Y3راکټ د جولای د ۲۴مې نېټې د ماسپښین په ۲ بجو او ۲۲ دقیقو د ونتیان په نوم د چين د فضايي سټېشن ازمويښتي برخې په اړولو سره فضا ته وتوغاوه، کابو تر ۴۹۵ ثانیو وروسته یاده ازمويښتي برخه له راکټ څخه جلا شوه او ټاکلي مدار ته ننوتله، دغه چارې په بریالیتوب سره بشپړې شوې.
د توغولو یاد کار په همدې ورځ د هی نان ولایت په ون چانګ توغوونکي ډګر کې ترسره شو او ډېر نندارچیان يې راجلب کړي و.
له شان شي ولایت څخه راغلي ښاغلي سو د چین ميډیا ګروپ له خبریال سره په مرکه کې وویل، چې ډېر خوشاله یم او ویاړم . څرنګه چې له دغه بریالي کار څخه ښکاري، چې چین د فضايي سټېشن د ابادۍ او جوړونې په برخه کې یو لوی ګام پورته کړی دی. موږ په دوبنۍ رخصتۍ کې له بچیانو سره په سیل راوتلي یو او د راکټ د توغولو بهیر مو هم ولید.
مېرمن یانګ چې له شانګهای ښار څخه هی نان ته راغلې، خبریال ته وویل، چې دا خورا په زړه پورې او د ویاړ وړ کار و، له ماشومانو سره مو پر لومړي ځل دغه شان سترې چارې وليدلې.
ښاغلي جیانګ چې له سه چوان ولایت څخه هی نان ته راغلی، خبریال ته وویل، چې د توغولو ډګر ته نږدې دغه بهیر لیدل ډېر د خوشالۍ وړ کار دی. همدارنګه د ملي بیرغ په اوچتولو سره مو دغه بهیر ولید او په دې سره زموږ احساسات څرګند شول.
د ون تیان نومي ازمويښتي برخه د چین د فضايي سټېشن دوهمه برخه او لومړۍ علمي ازمويښتي برخه ده. دغه برخه به په عمده توګه د فضانوردانو د پاتې کېدو، په بهرنۍ فضا کې د علمي څېړنیزو فعالیتونو او د بهرنیو علمي ازموینو لپاره ملاتړ وکړي.
د چین د فضايي تکنالوژۍ ډلې د پنځمې اکاډمۍ د فضايي سټېشن سيستم مرستیال عمومي ډیزاینر لیو ګانګ د ون تیان ازمويښتي برخې د ځانګړتیا په هکله وویل، چې دغه برخه یوه اضافي ۵ متره اوږد ماشيني بازو لري. دغه ماشيني بازو کوچني تجهیزات نیولی شي او ډېر نازک عملیات تر سره کولای شي. په راتلونکي کې به دغه بازو له بل ماشیني بازو سره د۱۵ مترو په اوږدوالي یو روباټیک بازو جوړ کړي څو په فضايي مدار کې نورې زیاتې علمي ازموینې ترسره کړي.
د ون تیان نومي ازمويښتي برخې فضايي سټېشن ته تر رسېدو وروسته به له ټاکلي پلان سره سم له فضايي سټېشن سره یو ځای شي، د شن جو ۱۴مې فضايي بېړۍ هوانوردان به دغې برخې ته ننوځي او اړوند علمي څېړنيزې چارې به ترسره کړي.
نوموړي زیاته کړه، چې د ون تیان نومي ازمويښتي برخه کې د علمي څېړنو او ازموینو لپاره بشپړ تجهیزات او ماشینونه ځای پر ځای شول، په دې ډله کې له ځمکې څخه یو لوی او مجهز لابراتوار فضا ته انتقال شوی دی.
د چین د علومو اکاډمۍ د فضايي چارو مرکز څېړونکي او د انسان وړونکې فضايي پروژې د فضايي سیسټم مرستیال عمومي انجنیر لو څونګ مین په یاده ازمویښتي برخه کې د ژوند او ايکولوژيکي چارو د ازموینې المارۍ په اړه وویل، چې هوانوردان به په فضايي چاپېریال کې د ژوندیو موجوداتو مختلف ډولونه د ژوند او ودې ازموینې تر عنوان لاندې ترسره کړي.
د مالوماتو له مخې، چین به په راتلونکو څو میاشتو کې د منګ تیان په نوم ازمويښتي برخه فضا ته وتوغوي او د تیان ګونګ فضايي سټېشن له مرکزي برخې سره به یو ځای شي.
