(خوشحاله ژوند) کتاب نوی پښتو ته ژباړل شوی دی. کتاب د بېلابېلو لیکوالانو، بریان ټرېسي، پاولو کویلو، مهاتماګاندي، اشفاق احمد او نورو د غوره ویناوو ټولګه ده چې پښتو ژباړه یې حسیب الرحمن ساحل کړې ده. د کتاب پښتو بڼه ۹۸ پاڼې لري.
د دغه کتاب هره کرښه د ژوند په اړه د یوه کس تجربه بیانوي، هغه تجربه چې هغه کس د خپلو کړنو په پایله کې له ژونده ترلاسه کړې ده. خو دا په یاد لری چې ژوند دومره اوږد نه دی چې تاسې دې هرڅه پکې تجربه کړی، ځکه ځینې تجربې د یو کس د عمر په اندازه وخت غواړي. که تاسې هرڅه تجربه کوی، نو عمر به مو یوازې تر تجربو قربان کړی وي.
ښه دا ده چې د ژوند د ځینو مسایلو په اړه د نورو له تجربو ګټه واخلی، څو په لږ وخت کې ډېر څه زده کړی. دا کتاب د همداسې کسانو د ژوند رښتینې تجربې بیانوي.
دوی د ژوند لوړې ژورې تجربه کړې، له هغو سره یې د مبارزې تګلاره او پر هغو یې د برلاسۍ هغه اصول چې پر مټ یې له دغو ستونزو راوتلي، د دې لپاره چې نور خلک ترې ګټه واخلي او پر مټ یې وخت سپما کړي، لیکلي دي او ژباړن په همدې موخه ژباړلې دي.
د کتاب ښه ځانګړنه دا ده چې د هر لیکوال خبره یې زموږ چاپېریال ته په کتو را اخیستې ده. ځکه د هر چاپېریال وګړي، د هغوی فکر او د ژوند په اړه د هغوی تصور د بل چاپېریال له وګړو سره توپیر لري. که یې د بل چاپېریال کړه وړه یا د ژوند په اړه نظر پر خپل تول برابر نه وي، ښه نه ورته ښکاري. په دغه کتاب کې دا هرڅه په نظر کې نیول شوي دي.
د کتاب ژبه روانه او خوږه ده، له سختو او دې داسې کلماتو له راوړلو پکې ډډه شوې، چې د مفهوم رسولو په لار کې خنډ کېږي.
په ټوله کې مو کتاب د ژوند په اصلي مانا پوهوي او دا درته ښيي چې څنګه ښه او داسې ژوند وکړی چې هم پرې خپله او هم ستاسې په اړه نور کسان پرې وویاړي.
مینهوال کولای شي دا کتاب په اکسوس او د ښار په نورو کتابپلورنځیو کې په مناسب قېمت تر لاسه کړي.
