د افغانستان، چين او هند لومړنۍ درې اړخیزه غونډه جوړه شوه

د بهرنیو چارو وزارت له لوري په خپره شوې خبرپاڼه کې راغلي، چین هند او افغانستان هوکړه کړې وه، چې د درې اړخیزو غونډو لړۍ به پيلوي او په دې توګه به درې واړه هېوادونه پر ځینو پروژو په ګډه کار کوي. چین او هند هم تېر میلادي کال هوکړه کړې وه چې په افغانستان کې به ګډې پروژې پيلوي. په دې درې اړخیزه غونډه کې چې کابل کې جوړه شوې وه ،د هند او چین سفیرانو او د بهرنیو چارو وزارت سیاسي مرستیال ادریس زمان ګډون کړی و. درېواړو هېوادونو هوکړه کړې، چې تر ډېره به د کانونو په استخراج، د زراعت پر انکشاف او وده، د کاري ظرفیتونو په لوړولو او دې ته ورته مهمو مسایلو تر ټولو ډېر تمرکز کوي.