ولایتي شورا: د حکومت له نه پاملرنې جګړه د کندوز ښار دروازو ته رسېدلې

د کندز ولایتي شورا او یو شمېر اوسېدونکي وایي چې طالبان لا هم د یاد ښار په څنډو کې فزیکي حضور لري. د ولایتي شورا رییس یوسف ایوبي وایي، د حکومت د نه پاملرنې له امله جګړه د کندوز ښار تر دروازو رسېدلې او د هرې ورځې په تېرېدو امنیتي وضعیت لا پېچلی کېږي. په ورته وخت کې د کندوز ښار یو شمېر اوسېدونکي هم ادعا کوي چې وسله والو طالبانو خبرداری ورکړی دی چې له خپلو کورونه ووځي، څو په جګړو کې ورته زیان وانه وړي. ولایتي شورا او خلکو پر مرکزي حکومت غږ کړی دی چې د ښار اړوندې سیمې دې د طالبانو له شتونه پاکې کړي څو خلک په ارامه فضا کې ژوند وکړي. خو د یاد ولایت امنیه قومنداني بیا خلکو ته ډاډ ورکوي چې دوی د وسله والو د هر ډول تحرکاتو پر وړاندې پوره چمتوالی لري او هغوی ته به پر دغه ښار د برید موقع په لاس ورنه کړي.