حامد کرزي یو ځل بیا؛ پر ملکي مرګ ژوبلې ژوره خواشیني څرګنده کړې

د هېواد پخواني ولسمشر حامد کرزي د غزني په ګیلان، د میدان وردګو په نرخ ولسوالیو کې شپني عملیات او په کابل کې د مخابراتو پر وزارت برید چې په پایله کې یې ملکي خلکو ته مرګ ژوبله اوښتې په کلکو ټکو غندلې او په هېواد کې یې د ملکي خلکو امنیت ته پر نه پاملرنې خپله ژوره اندېښنه څرګنده کړې. د نوموړي له مطبوعاتي دفتره په خپرې شوې اعلامیه کې راغلي، په هېواد کې د خلکو په وړاندې نظامي عملیات په هر عنوان چې وي، ناروا عمل دی او ژر تر ژره د بند شي. سرچینه کاږي، کرزی دغه راز په جګړه کې له ښکېلو غاړو غواړي چې د جنګ او وینې توییدنې پر ځای دې په هېواد کې د سولې او امن د ټینګښت لپاره، چې د افغانانو تر ټولو ستره هیله ده، په ګډه کار وکړي. اعلامیه کاږي، حامد کرزي دغه راز د بین الافغانی مذاکراتو د لړۍ پر ژر تر ژره بیا پیلېدو او د سولې د خبرو اترو پر دوام ټینګار کړی دی.