سره له دې چې په کابل کې په دې وروستیو کې امنیت او د خونړیو پېښو کموالي خلک هیله من کړي وو، خو پرون یو ځل بیا په تر ټولو امنه سیمه کې ډله ییز برید وشو. د وروستیو معلوماتو له مخې، په پېښه کې څلور ملکیان او درې افغان سرتېري وژل شوي دي او اته کسه نور ټپیان دي.
د کورنیو چارو وزارت ویاند نصرت الله رحیمي تېره ورځ ناوخته په یاده سیمه کې خبریالانو ته ویلي، چې ځانمرګو بریدګرو د مخابراتو وزارت ته څېرمه، له یوه زیارته په استفادې، د وزارت انګړ ته ننوتلي وو. د نوموړي په خبره، په لومړي سر کې یوه ځانمرګي بریدګر په یاده سیمه کې په ځان پورې تړلو چاودېدونکو توکو ته چاودنه ورکړه او وروسته څلور کسه نور وزارت ته دننه شول، چې وروسته یې له امنیتي ځواکونو سره نښته پيل کړه.
د رحیمي په خبره، وسله وال بریالي شوي نه دي چې د وزارت کارکوونکو او ودانۍ ته ډېر زیان واړوي، ځکه امنیتي ځواکونه په وخت سیمې ته رسېدلي دي او برید یې کابو کړی دی. د نوموړي په خبره، له مقاومت سره سره څلور ملکیان د وسله والو په برید کې وژل شوي دي. رحیمي زیاته کړې: ((بریدګر څلور کسان وو، برید شپږ ساعته دوام وکړ، د بریدګرو په وژل کېدو پای ته ورسېد، څلور ملکیان او درې افغان سرتېري په دغه پېښه کې شهیان شوي دي)).
بلخوا د مخابراتو وزیر بیا پر خپله رسمي فیسبوکپاڼه لیکلي، چې په ننني برید کې یې خپل پنځه همکاران له لاسه ورکړي دي.
د کورنیو چارو وزارت همدا راز ویلي چې په پېښه کې څلور وسله وال هم وژل شوي دي او د برید په اړه یې څېړنې پیل کړې دي. سره له دې چې په لومړي سر کې پر طالبانو د دغه برید شک کېده، خو وسله والو طالبانو د یوې اعلامیې په خپرولو سره په دغه برید کې خپل لاس لرل رد کړي دي.
د عامې روغتیا وزارت ویاند وحیدالله مایار ویلي، پېښه کې دوه کسان وژل شوي او شپږ ټپیان روغتونو ته لېږدول شوي دي. د کورنیو چارو وزارت د دوو وژل شویو بریدګرو تصویرونه خپاره کړي، چې پوځي یونیفورم یې اغوستی دی.
د افغان چارواکو په خبره، د برید د سیمې له شاوخوا ودانیو سلګونه کسان د خوندیتوب په موخه ایستل شوي وو. ویل کېږي چې مخابراتو او اطلاعاتو او کلتور وزارت ته نږدې ۳۰۰۰ ملکي کارکوونکي امنو سیمو ته د برید پر مهال لېږدول شوي وو. له ولسمشرۍ ماڼۍ څخه په یوه خپره شوې اعلامیه کې بیا ولسمشر غني دغه برید په کلکو ټکو غندلی دی. په اعلامیه کې راغلي، چې دغه برید د هېواد د ابادۍ او پرمختګ د دښمنانو له لوري شوی دی او افغان حکومت یې په کلکو ټکو غندي دي.
