سترې محکمې د نوي ولسمشر تر ټاکل کېدو پورې د ولسمشر غني کاري موده تمدید کړې ده. سره له دې چې د ملي یووالي حکومت مشرانو له لومړۍ کاري ورځې، پر وخت د ټاکنو پر ترسره کولو او په ټاکنیزو کمېسیونونو کې د اصلاحاتو راوستلو ژمنه کړې وه، خو اوس یې چې وخت مخ پر پوره کېدو دی، نو سترې محکمې یې کاري موده وغځوله. که څه هم د اساسي قانون له مخې د ولسمشر غني کاري موده یوه میاشت وروسته د جوزا په لومړۍ نېټه پای ته رسېږي، خو ولسمشرۍ ماڼۍ ویلي چې ولسمشر غني به شپږ میاشتې نور هم خپلې دندې ته ادامه ورکوي.
سیاسي جریانونه او د ولسمشریزو ټاکنو نوماندان د سترې محکمې دغه تصمیم د قانون خلاف بولي او وایي چې دوی پر داسې یوه طرح کار کوي، چې د جوزا تر لومړۍ نېټې وروسته بدیلې لارې وګوري.
د سترې محکمې د پرېکړې له مخې، د اساسي قانون پر اساس باید ټاکنې د ولسمشر تر لرې کېدو دوه میاشتې مخکې شوې وای، خو دا چې ټاکنې ځنډېدلې او د واک خلا رامنځ ته نه شي، د خپلو صلاحیتونو له مخې یې د ولسمشر غني کاري موده د نوي ولسمشر تر ټاکل کېدو پورې تمدید کړې ده. سترې محکمې ویلي چې په هېواد کې د واک د دوام او نوي ولسمشر تر راتګ پورې به ولسمشر غني پر خپل ځای وي.
بل پلو ارګ بیا تر دغه پرېکړې وړاندې ویلي وو، چې ستره محکمه د واک په اړه د پرېکړې صلاحیت لري، ځکه تر دې وړاندې هم په ټاکنو کې د ستونزو له امله سترې محکمې ته مراجعه شوې وه او دوی خپله پرېکړه وړاندې کړې وه. د ولسمشر د ویاند مرستیال شاه حسین مرتضوي په دې اړه ویلي: ((سترې محکمې تر دې وړاندې هم خپله پرېکړه کړې ده او اوس هم په دې برخه کې خپل قانوني واک لري. دوی به د حکمت په اړه پرېکړه کوي، له هغه پرته هم د اوسني حکومت شپږ میاشتې وخت پاتې دی او تر هغه به خپل کار ته دوام ورکوي)).
سیاسي جریانونه او د ولسمشریزو ټاکنو یوشمېر نوماندان د سترې محکمې له لوري د ولسمشر غني د کاري مودې د غځولو په تړاو غبرګون ښيي او وایي چې د اساسي قانون له مخې د ولسمشر غني کاري موده د جوزا یا غبرګولې په لومړۍ نېټه، چې شاوخوا یوه میاشت ورته پاتې ده ختمېږي.
دوی وایي چې د موقت حکومت، سرپرستې یا عبوري ادارې په شمول، په داسې یوه طرح کار کوي چې د قدرت خلا له رامنځ ته کېدو څخه مخنیوی وکړي. د ولسمشریزو ټاکنو نوماند عنایت الله حفیظ ویلي: ((په ټولو طرحو کار کوو، که هغه موقت حکومت وي، که سرپرسته یا عبوري اداره وي، خو د واک خلا به نه رامنځ ته کېږي)).
د حقوقي چارو شنونکي وایي، چې د ولسمشرۍ څوکۍ انتخاباتي ده او د سترې محکمې په شمول هېڅ مرجع یې د تمدید حق نه لري. شنونکي وایي چې د جوزا په لومړۍ نېټه د ولسمشر غني د کاري مودې له پای ته رسیدو سره هممهاله، د اجرايه ریاست د کار دوام هم د قانون خلاف دی. د حقوقي چارو شنونکي سید حبیب الله هاشمي ویلي، ستره محکمه دا صلاحیت نه لري چې د یوې انتخابي څوکۍ موده وغځوي.
په ورته وخت کې اجرايه ریاست هم وایي، چې د سترې محکمې له لوري ورته پرېکړې پخوا هم شوې وې او د سترې محکې د حکم پر اساس به نه یوازې ولسمشر غني، بلکې د ملي یوالي حکومت دوره د نوي ولسمشر تر راتګ پورې دوام کوي.
د سترې محکمې له لوري د نوي ولسمشر تر ټاکل کېدو پورې د ولسمشر غني د کاري مودې د تمدید په تړاو څرګندونې داسې مهال دي، چې ولسمشر غني په خپلو ډېرو غونډو او سیاسي مجالسو کې ټینګار کړی، چې د خپل وخت تر پوره کېدو به یوه ورځ هم خپل کار ته ادامه نه ورکوي.
