په کونړ کې سیمه ییز خلک وايي چې پاکستاني ځواکونو پر افغان خاوره له توغندويي بریدونو وروسته اوس په پینځو ولسوالیو کې له کرښې دې خوا د افغانستان خاوره نوره هم لاندې کړې او اغزن سیم یې پکې تېر کړی دی. سیمه ییز خلک وايي چې د پاکستاني توغندويي بریدونو له امله خلکو خپلې سیمې پرې اېښې وې، چې اوس یې سیمې پاکستان لاندې کړي او د ډېری کسانو کورونه او ځمکې له اغزن سیمې هاخوا پاتې شوې دي. د دې تر څنګ د پکتیکا په برمل ولسوالۍ کې هم د پاکستان له خوا توغندویي بریدونه روان دي او ورسره پاکستاني ځواکونه له کرښې پینځه کیلومتره دې خوا راغلي او اغزن سیم یې تېر کړی دی. تر دې وړاندې ویل شوي وو چې پاکستاني ځواکونه په ځینو سیمو کې د کونړ تر سینده راغلي او اغزن تارونه یې لګولي دي.
حکومت د پاکستان د دغو تحرکاتو په اړه چوپ دی چې نه یې د مخنیوي هڅه کوي او نه یې هم په دې اړه کوم ښکاره اعتراض کړی دی. له همدې امله خلک پر حکومت نیوکې کوي او آن حکومتي مشران له پاکستان سره پر پټو معاملو تورنوي.
د پاکستان دغه بریدونه، تېری او د افغان خاورې لاندې کول او بیا پرې د حکومت سکوت د جدي اندېښنې وړ دي. پاکستان له یوه اړخه په ظلم او زور د ډیورنډ کرښې په وسیله افغان خاوره لاندې کړې او اوس پر دې کرښه هم بسنه نه کوي، بلکې په ډېرو سیمو کې یې له کرښې دې خوا ډېرې سیمې لاندې کړي، اغزن سیم یې پرې لګولی او تاسیسات یې جوړ کړي دي. د حکومت چوپتیا که په هر دلیل وي، د زغم وړ نه ده. که پټه ناوړه معامله شوې وي، نو بیا خو په هېڅ ډول د توجیه وړ نه ده، خو که حکومت فکر کوي چې د غږ په پورته کولو او د پاکستان د دغو تحرکاتو د مخنیوي له لارې به دوی له ستونزو سره مخ شي او یا به نور زیان وویني، بیا هم د توجیه وړ نه ده. له بده مرغه په وروستیو کلونو کې حکومت پاکستان ته یو اړخیز امتیازات ورکوي چې په بدل کې یې افغانستان هېڅ هم نه تر لاسه کوي. د دغو امتیازاتو له امله نه په افغانستان کې امن راغلی او نه هم پاکستان د افغانستان پر وړاندې له دښمنۍ ډک چلند پرې اېښی دی. له همدې امله حکومت د خلکو د غوښتنې او ارادې خلاف د پاکستان پر وړاندې مرګونی سکوت کړی دی چې زیان یې د افغانستان خلکو ته رسیږي.
اوس پکار ده چې د پاکستان د دغو تحرکاتو پر وړاندې اوسنۍ چوپتیا ماته شي. نه یوازې دا چې حکومت باید په دې اړه ښکاره اعتراض وکړي، بلکې په عملي ډول باید خپله خاوره بېرته خپله کړي او د پاکستان اغزن سیم، تاسیسات او پوستې ور ټولې کړي. له دې پرته پر حکومت هر ډول شک کېدلی شي او ولس به یې پر وړاندې ودرېږي. که حکومت ژر په دې اړه خپل دریځ روښانه نه کړي او ګام وانهخلي، ولس به خپله هم د پاکستان د دغه تېري پر وړاندې او د حکومت پر وړاندې ګام واخلي.
